O‘zbekistonlik haydovchilar BAAda ishga qabul qilinadi
Birlashgan Arab Amirliklarida mehnat migratsiyasi sohasida muhim qadam qo‘yildi. Bu haqda Zamin.uz xabar berdi.
O‘zbekistonning Bosh konsulxonasi xodimlari Dubaydagi “Dubai Taxi Company PJSC” kompaniyasi rahbariyati bilan uchrashuv o‘tkazdi. Uchrashuvda ikki tomon o‘zbekistonlik haydovchilarni BAAda qonuniy va munosib sharoitlarda ish bilan ta’minlash hamda o‘zaro manfaatli hamkorlikni yo‘lga qo‘yish masalalarini muhokama qildi.
“Dubai Taxi Company PJSC” rahbari Sayid Amin Abdulrahman O‘zbekistondan malakali haydovchilarni ishga qabul qilishga katta qiziqish bildirganini ma’lum qildi. Kompaniya faoliyatini kengaytirish va xizmat sifatini oshirish maqsadida turli mamlakatlardan tajribali mutaxassislarni jalb qilmoqda.
O‘zbekiston haydovchilari haqida ijobiy fikrlar ham hamkorlikni rivojlantirish uchun asos bo‘lmoqda. Abdulrahmanning aytishicha, dastlabki bosqichda 200 nafar o‘zbekistonlik haydovchini taksi haydovchisi sifatida ishga joylashtirish rejalashtirilgan.
Agar ular o‘z ish faoliyatida yaxshi natijalar ko‘rsatsa, keyingi bosqichda yana 500 nafarga yaqin haydovchilarni ishga qabul qilish ko‘zda tutilmoqda. Uchrashuvda haydovchilarni tanlash, hujjatlarni rasmiylashtirish va mehnat faoliyatini qonuniy asosda tashkil etish bo‘yicha amaliy choralar ham muhokama qilindi.
Kompaniya rahbariyati ishga qabul jarayonida barcha huquqiy talablar va mehnat muhofazasi standartlariga qat’iy rioya qilinishini ta’kidladi. O‘zbekiston Bosh konsulxonasi vakili esa mamlakatda taksi haydovchilari uchun maxsus o‘quv dasturlari, til tayyorgarligi va transport etikasi bo‘yicha kurslar tashkil etilayotganini bildirdi.
Bu yurtdoshlarimizga xalqaro mehnat bozorida raqobatbardosh bo‘lish imkonini beradi. Muzokaralar yakunida O‘zbekiston Mehnat agentligi va “Dubai Taxi Company PJSC” rahbariyati hamkorlikning keyingi bosqichlarini muhokama qilib, haydovchilarni tanlov orqali tanlash va ularni BAAga jo‘natish bo‘yicha amaliy ishlarni boshlashga kelishib oldi.
Tomonlar bu tashabbus nafaqat ish o‘rinlarini yaratishda, balki ikki davlat o‘rtasidagi mehnat va iqtisodiy hamkorlikni mustahkamlashda muhim qadam ekanini ta’kidladi. Shunday qilib, BAAda o‘zbekistonlik haydovchilar uchun yangi ish imkoniyatlari ochilishi kutilmoqda.
Bu esa yurtdoshlarimizga barqaror daromad manbai bo‘lish bilan birga milliy mehnat salohiyatini xalqaro maydonda namoyon etish imkonini yaratadi.
