Polshada qadimiy xanjar noyob topildi
Polshaning Boltiq dengizi sohilida turli davrlarga oid ko‘plab tarixiy topilmalar uchraydi. Bu haqda Zamin.uz xabar berdi.
Yaqinda esa mahalliy olimlar juda katta tarixiy ahamiyatga ega noyob buyumni aniqlashdi, deb xabar beradi Muzeum Historii Ziemi Kamieńskiej. Kamen shahri yaqinidagi sohil hududida kuchli bo‘ron natijasida yer qiyaliklari yemirilib, yer ostida taxminan uch ming yil davomida saqlangan qadimiy metall buyum yuzaga chiqdi.
Bu buyum miloddan avvalgi 800–450-yillarga oid bo‘lib, yarim oy shaklida va geometrik naqshlar bilan bezatilgan xanjar ekani ma’lum bo‘ldi. Topilmani tarixga qiziqqan Yatsek Ukovskiy va Katajina Gerdjik bo‘rondan keyin sohil bo‘ylab sayr qilayotganda aniqlashdi.
Ular loy qatlamidan metall buyumning bir qismi ko‘zga tashlanganini ko‘rib, uni olib muzey direktori Gjegoj Kurkaga darhol xabar berishdi. Xanjar uzunligi 24 santimetr bo‘lib, uning nafaqat bezaklari, balki ishlov berish sifati ham juda yuqori darajada ekanligi ta’kidlanmoqda.
Dastasi o‘tkir va san’atkorlik mahoratini namoyon etadi. Muzey direktori fikricha, bu buyum Polsha hududida topilgan eng noyob temir davri artefaktlaridan biridir.
Ancient Origins nashrining ma’lumotlariga ko‘ra, xanjar shakli va naqshlari uning jang uchun emas, balki diniy yoki marosim maqsadida ishlatilganini ko‘rsatadi. Boy bezaklar va jang izlarining yo‘qligi bu taxminni yanada kuchaytiradi.
Shu bilan birga, uning mustahkam va muvozanatli tuzilishi ba’zi tadqiqotchilarda uning yuqori martabali jangchiga tegishli qurol bo‘lishi mumkin degan fikrni uyg‘otgan. Muzey direktori Gjegoj Kurka xanjarning kelib chiqishi haqida shunday fikr bildirdi: “Bu buyum ehtimol o‘sha davrdagi metall ishlov berish markazlaridan biri – hozirgi Italiya, Avstriya yoki Bolqon mintaqasida yasalgan.
Keyinchalik qadimiy savdo yo‘llari orqali shimolga, ya’ni Polshaga olib kelingan bo‘lishi mumkin”. Hozirda xanjar maxsus sharoitda saqlanmoqda va yaqin kunlarda o‘tkaziladigan laboratoriya tahlillari uning tarkibi, yoshi va funksiyasini aniq belgilaydi.
Tarixchilar ushbu topilmani Yevropaning temir davri madaniyati uchun muhim dalil sifatida baholamoqda. Boltiq sohilida yana bir bor insoniyat sivilizatsiyasining qadimiy izlari yorqin namoyon bo‘ldi.
Bu topilmalar tarixiy tadqiqotlarga yangi ma’lumotlar qo‘shish bilan birga, qadimiy davr madaniyati va savdo aloqalarini o‘rganishda muhim ahamiyat kasb etadi.
