Yevropada qush grippi erta va tez tarqalmoqda

Yevropada qush grippi kasalligi odatdagidan ancha erta boshlangan va tez sur’atlarda tarqalmoqda. Bu haqda Zamin.uz xabar berdi.

Mutaxassislarning ta’kidlashicha, bu so‘nggi o‘n yil ichida eng erta va keng ko‘lamli kasallikning yoyilishi hisoblanadi. Bir necha o‘n mamlakatda qush grippi holatlari qayd etilgan bo‘lib, bu parranda xo‘jaliklari va oziq-ovqat ta’minotiga jiddiy tahdid solmoqda.

2022-yilda shunga o‘xshash vaziyat natijasida millionlab parranda yo‘q qilinishi kuzatilgan edi. Kasallik asosan ko‘chib yuruvchi yovvoyi qushlar orqali tarqalmoqda.

Avgust oyidan oktyabr o‘rtalarigacha Yevropa Ittifoqining o‘n davlatida hamda Buyuk Britaniyada 50 dan ortiq yangi holatlar aniqlangan. Eng ko‘p zararlangan mamlakatlar qatorida Polsha, Ispaniya va Germaniya alohida ajralib turadi.

Mutaxassislar virusning erta tarqalishi sababli bu yilgi qish mavsumining yanada murakkab o‘tishi mumkinligini ogohlantirmoqda. Belgiyada va Fransiyada yangi kasallik holatlari aniqlangach, hukumatlar barcha parranda turlarini yopiq sharoitda saqlash choralarini joriy etdi.

Bu chora kasallikning yanada tarqalishini oldini olish uchun zarur deb hisoblanmoqda. Odatda bunday cheklovlar qish mavsumida qo‘llanilar edi, ammo bu safar kasallikning erta avj olishi hukumatlarni oldindan tayyorgarlik ko‘rishga majbur qilmoqda.

Jahon sog‘liqni saqlash tashkiloti virusning insonlarga yuqish xavfi hozircha past ekanligini bildirgan. Shunga qaramay, hayvonlardan odamlarga o‘tishi mumkin bo‘lgan holatlarga jiddiy e’tibor qaratish zarurligi ta’kidlanmoqda.

Fransiyada o‘rdaklarni emlash bo‘yicha kampaniya boshlangan bo‘lib, bu kasallikni nazorat qilishda muhim qadam sifatida baholanmoqda. Qush grippi Yevropa bilan cheklanmay, AQSh, Osiyo va boshqa mintaqalarda ham kuzatilmoqda.

AQShda 180 milliondan ortiq parranda kasallik sabab yo‘q qilingan, Braziliya esa kasallikdan xoli hudud sifatida e’lon qilingan. Ushbu holatlar qush grippining global miqyosdagi xavfini yana bir bor ko‘rsatmoqda va tegishli choralarni kuchaytirishni talab etmoqda.