Shanxayda bir er-xotin yangi tug‘ilgan farzandining ismini tanlash masalasida bir yildan ortiq vaqt davomida kelisha olmaganligi sababli ajrashishga qaror qildi. Bu haqda Zamin.uz xabar berdi.
Juftlik 2023 yilda rasmiy nikohdan o‘tgan va bir yil o‘tib o‘g‘il farzand ko‘rgan. Biroq, farzandning ismi bo‘yicha tushunmovchiliklar va janjallar yuzaga kelgan.
Bu muammo bir yil davomida davom etdi va natijada bolaning tug‘ilganligi to‘g‘risidagi guvohnoma olinmaganligi sababli u tibbiy yordamdan cheklangan holda qolgan. Shanxay Pudun tumani sudi ma’lumotlariga ko‘ra, ota-onalar bolaga yoqqan ismni ro‘yxatga olish uchun kasalxonaga murojaat qilishgan, lekin qoidalarga muvofiq ismni ikkala ota-ona ham tasdiqlashi shart bo‘lgani uchun bu amalga oshmagan.
Sud jarayonida ota-onalarning farzandga yetarli g‘amxo‘rlik qilmagani aniqlandi, chunki tug‘ilganlik haqidagi hujjatning yo‘qligi voyaga yetmagan shaxsning huquqlarini buzish hisoblanadi. Sud ota-onalarga belgilangan muddatda barcha hujjatlarni rasmiylashtirish va farzandning ism-sharifini aniqlash majburiyatini yukladi.
Shunga qaramay, er-xotin hujjatlarning asl nusxalarini kimga berish masalasida ham kelisha olmadi. Natijada tug‘ilganlik guvohnomasini huquqni muhofaza qilish organlariga topshirish qarori qabul qilindi.
Ushbu holat oilaviy munosabatlarda ishonch va kelishuv muhimligini yana bir bor ko‘rsatmoqda.
