Kamala Harris prezidentlikka qaytishni ko‘rib chiqmoqda
AQSHning sobiq vitse-prezidenti Kamala Harris kelajakda yana prezidentlikka nomzodini qo‘yishi mumkinligini ma’lum qildi va siyosiy faoliyatda davom etish ehtimolini ochiq qoldirdi. Bu haqda Zamin.uz xabar berdi.
BBC nashriga bergan intervyusida u siyosatdan butunlay chetga chiqishni hozircha rejalashtirmayotganini, jamiyatga xizmat qilish uning tabiatida borligini ta’kidladi. Harris butun faoliyati davomida odamlarga xizmat qilishni asosiy vazifa sifatida ko‘rganini aytdi va bu tuyg‘uni o‘zgartirishni istamasligini bildirdi.
U “Men butun faoliyatimni odamlarga xizmat qilish bilan o‘tkazganman va bu mening tabiatimda bor. Buni o‘zimdan ayirolmayman”, dedi.
Savolga, “Qachondir Oq uyning birinchi ayol rahbari bo‘la olasizmi?” deganida, Harris “Ehtimol, ha” deb javob berdi. Biroq hozircha prezidentlikka nomzod bo‘lish yoki bo‘lmaslik haqida yakuniy qaror qabul qilmaganini aytdi.
AQSHdagi navbatdagi prezidentlik saylovi 2028 yilda o‘tkaziladi. Shu munosabat bilan Harris siyosiy faoliyatining yangi bosqichini boshlash yoki boshqa yo‘nalishda ishlash haqida hali o‘ylab ko‘rayotganini bildirdi.
U xizmat qilishning ko‘p usullari borligini va kelajakda aynan nimani tanlashini hali hal qilmaganini qo‘shimcha qildi. Harris Demokratik partiya uchun o‘z nomzodining ahamiyatsiz yoki kuchsiz deb hisoblanishiga oid fikrlarga ham javob berdi.
Uning so‘zlariga ko‘ra, u faqat so‘rovlar va tahlillarga emas, balki ishonch va harakatga tayanadi. “Agar men faqat so‘rov natijalariga qaraganimda, ehtimol, birinchi yoki ikkinchi lavozimga nomzodimni qo‘ymagan bo‘lardim.
Hozir esa men bu yerda turibman”, dedi u. Shuningdek, Harris amaldagi prezident Donald Tramp faoliyatini tanqid qildi.
Uning fikricha, Tramp federal idoralarni shaxsiy maqsadlarida qo‘llagan va ayrim biznes hamda tashkilot rahbarlariga bosim o‘tkazgan. “Ko‘pchilik odamlar hali u hokimiyatga qaytmasidan oldin uning oldida tiz cho‘kdi.
Ular hokimiyatga yaqin bo‘lishni yoki javobgarlikdan qochishni xohlashdi”, dedi Kamala Harris. Eslatib o‘tamiz, so‘nggi prezidentlik saylovida Kamala Harris 48,43 foiz ovoz olgan, ammo g‘alaba Donald Trampga nasib etgan edi.
Shu sababli u siyosiy revansh haqida jiddiy o‘ylamoqda.
