Tailand va Kambodja o‘rtasida tinchlik shartnomasi imzolandi
Janubi-Sharqiy Osiyoda bir necha oy davom etgan harbiy mojarolar yakunlandi. Bu haqda Zamin.uz xabar berdi.
Tailand bosh vaziri Anutin Chanvirakun va Kambodja hukumati rahbari Hun Manet AQSh prezidenti Donald Tramp ishtirokida tinchlik shartnomasini imzoladilar. Bu haqda Thmey Thmey nashri xabar berdi.
Imzolash marosimi Malayziya poytaxti Kuala-Lumpurda bo‘lib o‘tdi. U Janubi-Sharqiy Osiyo davlatlari assotsiatsiyasi – ASEAN sammiti doirasida tashkil etildi.
Ushbu kelishuv mintaqada barqarorlikni tiklash va ikki qo‘shni davlat o‘rtasidagi uzoq yillik nizolarga nuqta qo‘yishni maqsad qilgan. AQSh prezidenti Donald Tramp o‘z nutqida tinchlik kelishuvini Janubi-Sharqiy Osiyoda barqarorlik sari muhim qadam deb atadi.
Shuningdek, Kambodjada hibsda bo‘lgan 18 harbiy asir ozod etilganligini bildirdi. Tramp tinchlik barqaror bo‘lishi uchun xalqaro nazorat zarurligini ta’kidladi va Malayziya hamda boshqa Osiyo davlatlaridan maxsus kuzatuvchilar joylashtirilishini ma’lum qildi.
Tailand va Kambodja o‘rtasidagi chegara mojarosi 2025-yil may oyida keskinlashgan edi. Bir necha hafta davom etgan qurolli to‘qnashuvlarda har ikki tomon artilleriya va havo hujumlaridan foydalangan, tinch aholi orasida ham jabrlanganlar bo‘lgan.
Iyul oyiga kelib, harbiy harakatlar kuchaygani sabab xalqaro hamjamiyat aralashuvi zarurati yuzaga keldi. AQSh, Xitoy va Malayziya vositachiligida olib borilgan muzokaralardan so‘ng tomonlar avval sulh, keyin esa to‘liq tinchlik shartnomasini imzolashga kelishib oldilar.
Tahlilchilar fikricha, mazkur kelishuv nafaqat ikki davlat, balki butun mintaqaning geosiyosiy barqarorligi uchun katta ahamiyatga ega. Bu kelishuv iqtisodiy hamkorlikni rivojlantirish va chegara xavfsizligini mustahkamlashda yangi davrni boshlab beradi.
