Yangi Zelandiyada bola magnit yutib jarrohlik qilindi

Yangi Zelandiyada 13 yoshli o‘smir internet orqali sotib olgan magnitlar sabab og‘ir jarrohlik amaliyotiga muhtoj bo‘ldi. Bu haqda Zamin.uz xabar berdi.

The Guardian nashrining xabar berishicha, bola taxminan 100 dona kuchli neodim magnitni yutib yuborganidan keyin shifokorlar uning ichagidan ularni chiqarish maqsadida operatsiya o‘tkazishgan. To‘rt kun davomida kuchli qorin og‘rig‘idan aziyat chekkan o‘smir Tauranga shifoxonasiga yotqizildi.

Rentgen tekshiruvida magnitlar ichak devorini kesib o‘tganligi va bir necha joyda to‘qima nekrozi yuzaga kelgani aniqlandi. Shifokorlarning ta’kidlashicha, bola yutgan magnitlar yuqori kuchga ega bo‘lib, ichak ichida bir-biriga tortilib, organ devorlariga zarar yetkazgan.

Operatsiya vaqtida jarrohlar ingichka va yo‘g‘on ichakning bir nechta qismidagi o‘lik to‘qimalarni olib tashlashgan. Bolaning hayotini saqlab qolish uchun amaliyot besh soatdan ko‘proq davom etdi.

Qiziqarli jihati shundaki, bunday magnitlar Yangi Zelandiyada 2013-yildan beri sotilishi taqiqlangan. Biroq o‘smir ularni Temu nomli onlayn savdo maydonidan xarid qilgan.

Kompaniya ushbu holat yuzasidan ichki tekshiruv boshlanganini ma’lum qildi. Kompaniya bayonotida aytilishicha, hozirda tekshiruv jarayoni davom etmoqda.

Magnitlarning aynan Temu orqali sotib olingani rasman tasdiqlanmagan, ammo barcha xavfli mahsulotlar ro‘yxati qayta ko‘rib chiqilmoqda. Mutaxassislar bunday holatlar keyinchalik ichak tutilishi, churra va doimiy og‘riqlar kabi jiddiy asoratlarga olib kelishi mumkinligini ta’kidlamoqda.

Shu sababli, ota-onalarga kichik bolalar va o‘smirlarning onlayn xaridlariga alohida e’tibor berishni tavsiya qiladilar.