AQSH va Xitoy vakillari Malayziyada o‘tkazilgan ASEAN sammiti doirasida yangi savdo kelishuvi bo‘yicha dastlabki kelishuvga erishdi. Bu haqda Zamin.uz xabar berdi.
Muzokaralar natijasida tomonlar boj stavkalarini vaqtincha to‘xtatishga va Xitoyning kamyob metallar eksportiga qo‘yilgan cheklovni bir yilga kechiktirishga rozi bo‘ldi. AQSH moliya vaziri Skot Bessentning ta’kidlashicha, bu qaror Prezident Donald Tramp tomonidan noyabr oyidan boshlab joriy etilishi kutilgan 100 foizlik bojlarni bekor qiladi.
Shuningdek, Xitoy AQSHdan soya mahsulotlarini qayta sotib olishni boshlaydi. Xitoy tomoni esa ushbu kelishuv haqida ehtiyotkorlik bilan izoh berib, uning dastlabki xarakterga ega ekanligini ma’lum qildi.
Vitse-premyer Xe Lifeng muzokaralar murosali ruhda o‘tganini, ammo yakuniy qaror ikki davlat rahbarlari uchrashuvidan so‘ng e’lon qilinishini ta’kidladi. Prezident Tramp va Xitoy rahbari Si Szinpin 31-oktabr kuni Janubiy Koreyada o‘tkaziladigan Osiyo-Tinch okeani iqtisodiy sammitida uchrashadi.
Ular savdo kelishuvining asosiy shartlarini tasdiqlashi kutilmoqda. Mutaxassislar fikricha, ushbu kelishuv AQSH va Xitoy o‘rtasidagi tarang savdo munosabatlarini yumshatishi hamda global bozorlarning barqarorligiga ijobiy ta’sir ko‘rsatishi mumkin.
Bu kelishuv ikki davlat o‘rtasidagi iqtisodiy aloqalarni yaxshilashga qaratilgan muhim qadam sifatida baholanmoqda.
