Qozog‘istonning Olmaota shahridagi Markaziy shahar klinik shifoxonasida 63 yoshli ayol donor sifatida bir nechta bemorning hayotini saqlab qoldi, deb xabar berdi mamlakat Sog‘liqni saqlash vazirligi. Bu haqda Zamin.uz xabar berdi.
Ayolning yuragi 1988 yilda tug‘ilgan bemorga ko‘chirib o‘tkazildi. Shuningdek, uning jigari 1982 yilda tug‘ilgan bemorga, o‘ng buyragi 1996 yilda tug‘ilgan yigitga va chap buyragi 1966 yilda tug‘ilgan bemorga transplantatsiya qilindi.
Donorning ko‘z shox pardalari esa ikki bemorga — 1983 va 1956 yillarda tug‘ilgan insonlarga ko‘rish qobiliyatini tiklash imkonini berdi. Transplantatsiya jarayonlarini Respublika transplantatsiya markazi tashkil etdi, Olmaotaning yetakchi tibbiyot muassasalari mutaxassislari ishtirok etdi.
Shifokorlar ayolning yoshiga qaramay, uning organlari yaxshi holatda ekanligini va muvaffaqiyatli faoliyat yuritayotganini ta’kidladi. Bu holat donor yoshining hayotni saqlab qolishda to‘siq emasligini yana bir bor isbotladi.
Markaz vakillari ayolning oilasiga jasoratli qarori uchun minnatdorlik bildirdi va shifokorlar jamoasining hamjihat mehnatini alohida ta’kidladi. Bu voqea organ donorligi ahamiyatini yana bir bor ko‘rsatdi va hayot saqlashda donorlarning o‘rni qanchalik muhim ekanligini tasdiqladi.
