Tramp va Si Jinping Busanda muhim kelishuvga erishdi
AQSh Prezidenti Donald Tramp va Xitoy Raisi Si Jinping o‘rtasida Janubiy Koreyaning Busan shahrida muhim uchrashuv bo‘lib o‘tdi. Bu haqda Zamin.uz xabar berdi.
Bu uchrashuv ikki davlat rahbarlari o‘rtasida 2019-yildan buyon ilk yuzma-yuz muloqot bo‘lib, Trampning Janubi-Sharqiy Osiyodagi besh kunlik safari yakunida tashkil etildi. Muzokaralar davomida AQSh va Xitoy o‘rtasidagi savdo keskinligini kamaytirish, tarif siyosati va strategik hamkorlik masalalari muhokama qilindi.
Uchrashuv Janubiy Koreya harbiy aerodromida bo‘lib o‘tdi va ikki soat davom etdi. Tramp muzokaralar avvalida samarali muloqot bo‘lishiga ishonch bildirdi.
Si Jinping esa ikki davlat o‘rtasidagi ba’zan yuzaga keladigan kelishmovchiliklarni tabiiy hol deb atadi. Muzokaralar davomida Xitoy rahbari ikki tomonlama munosabatlarni mustahkamlashga tayyor ekanini bildirdi.
Uchrashuv yakunida tomonlar bir-birini samimiy kuzatdi. Muzokaralar tafsilotlari oshkor qilinmagan bo‘lsa-da, ekspertlar bu uchrashuvni ikki davlat munosabatlarida yangi bosqich sifatida baholamoqda.
Muzokaralar fonida jahon fond bozorlari ijobiy reaksiya ko‘rsatdi. Xitoyning birjalari yuqori ko‘rsatkichlarga chiqdi, yuan esa dollarga nisbatan bir yillik maksimumga erishdi.
Bu investorlar orasida savdo keskinligi yumshashi borasidagi ishonchni oshirdi. Tramp Xitoyga nisbatan joriy etilgan ayrim tariflarni kamaytirish niyatini bildirdi.
Evaziga Xitoy AQShda keng tarqalgan sintetik narkotik fentanilning ishlab chiqarilishida qo‘llaniladigan kimyoviy moddalarning eksportini to‘xtatishga rozi bo‘ldi. Shuningdek, TikTok ijtimoiy tarmog‘i bo‘yicha ham kelishuvga yaqinlashilganini ma’lum qildi.
AQSh moliya vazirligi Xitoy delegatsiyasi bilan qo‘shimcha muzokaralar o‘tkazib, noyob yer metallariga nisbatan eksport cheklovlarini kechiktirish masalasini muhokama qilgani xabar qilindi. Bu metallar AQSh texnologiya sohalari uchun muhim hisoblanadi.
Trampning Osiyo safari davomida Xitoyning noyob yer metallari bozoridagi monopoliyasini cheklash asosiy maqsadlardan biri bo‘ldi. U Yaponiya va Janubi-Sharqiy Osiyo davlatlari bilan hamkorlik bitimlari imzoladi.
Vashington ushbu uchrashuvni kelgusidagi muzokaralar uchun ishonchli poydevor sifatida baholamoqda. Mutaxassislar fikricha, agar muzokaralar izchil davom etsa, AQSh va Xitoy o‘rtasidagi savdo munosabatlari yaxshilanib, bu jahon iqtisodiyoti uchun barqarorlik yaratishi mumkin.
