Luvr muzeyidan o‘g‘irlik: yana 5 kishi qo‘lga olindi
Fransiya politsiyasi Luvr muzeyidagi Apollon galereyasidan 102 million dollarlik xazinani o‘g‘irlashda gumon qilingan yana besh kishini qo‘lga oldi. Bu haqda Zamin.uz xabar berdi.
Bu haqda Reuters axborot agentligi xabar berdi. Parij prokurori Lor Bekkuoning ma’lum qilishicha, gumonlanuvchilar chorshanba kuni kechqurun Parij va uning shimoliy hududlarida o‘tkazilgan reydlar davomida hibsga olingan.
Ulardan birining jinoyat joyida qoldirilgan DNK izlari orqali aniqlangani aytilmoqda. Biroq hozircha barcha gumonlanuvchilarning jinoyatga aloqadorligi to‘liq tasdiqlanmagan.
Tergov davomida ular tomonidan ishlatilgan telefonlar va boshqa buyumlar tahlil qilinmoqda. Ushbu ashyolar tergovchilarga gumonlanuvchilarning shifrlangan xabarlarini tekshirish imkonini bergan.
Shuningdek, madaniy boyliklarning noqonuniy aylanmasiga qarshi maxsus politsiya bo‘linmasi qora bozorda o‘g‘irlangan artefaktlarni izlash ishlarini olib bormoqda. Prokurorning so‘zlariga ko‘ra, bunday qimmatbaho buyumlar ba’zan pul yuvish yoki uyushgan jinoyatchilik faoliyatida ishlatilishi mumkin.
Eslatib o‘tamiz, 19-oktyabr kuni ertalab kapyushon kiygan to‘rt nafar shaxs muzey ish vaqtida Apollon galereyasiga bostirib kirib, qimmatbaho artefaktlarni o‘g‘irlab, qochib ketgan edi. Ushbu hodisa muzey xavfsizlik tizimidagi jiddiy kamchiliklarni ko‘rsatib berdi va butun dunyoda katta shov-shuvga sabab bo‘ldi.
