Sobiq maslahatchi Erjan Babakumarov mojaro oqibatida vafot etdi
Qozog‘iston Prezidenti Qasim-Jo‘mart Toqayevning sobiq maslahatchisi Erjan Babakumarov Astana shahrida yuz bergan mojaro oqibatida halok bo‘ldi. Bu haqda Zamin.uz xabar berdi.
Bu haqda Qozog‘iston politsiyasi ma’lumotlariga tayanib xabar berilgan. Tergov ma’lumotlariga ko‘ra, 56 yoshli Babakumarov va 36 yoshli erkak o‘rtasida kelib chiqqan kelishmovchilik janjalga aylanib ketgan.
Mojaro davomida sobiq amaldor og‘ir jarohatlar olgan va uning hayotini saqlab qolishning imkoni bo‘lmagan. Mazkur hodisa yuzasidan gumonlanuvchi ustidan jinoyat ishi qo‘zg‘atilgan, hozirda u vaqtinchalik hibsda saqlanmoqda.
Ma’lum qilinishicha, Qasim-Jo‘mart Toqayev 2019 yilda Prezident lavozimini egallaganidan so‘ng, Erjan Babakumarovni o‘zining maslahatchisi etib tayinlagan edi. Biroq oradan bir necha oy o‘tib, Babakumarov bu lavozimni tark etdi.
Shuningdek, 2019 yil aprelidan 2022 yil fevral oyigacha u Olmaota shahar hokimining o‘rinbosari lavozimida ishlagan. 2022 yil yanvar voqealaridan keyin esa iste’foga chiqqan edi.
