O‘rtachirchiqda yangi aeroport qurilishi rejalashtirilmoqda
O‘rtachirchiq tumanida Kuyichirchiq tumani bilan chegaradosh hududda yangi xalqaro aeroport qurilishi rejalashtirilmoqda. Bu haqda Zamin.uz xabar berdi.
Bu haqda tuman hokimiyati ma’lum qildi. Ushbu loyiha doirasida qurilish hududiga tushib qolgan Xalqobod va Yangiyo‘l mahallalaridagi uylar buzilishi ko‘zda tutilgan.
Buzilgan uylar uchun mulk egalariga qonunchilikda belgilangan tartibda kompensatsiya to‘lanadi. O‘rtachirchiq tumani hokimi Islom Qosimov Xalqobod mahallasi aholisi va fermer xo‘jaliklari rahbarlari bilan uchrashuv o‘tkazdi.
Uchrashuvda aholiga ko‘chirish jarayoni, to‘lov tartibi va zarur protseduralar haqida batafsil tushuntirish berildi. Shuningdek, kompensatsiya olish uchun talab qilinadigan hujjatlar ro‘yxati va bu jarayonning qonuniy tartibi haqida ma’lumot yetkazildi.
Tuman xizmatlari vakillari aholini qiziqtirgan barcha savollarga javob berib, ko‘chirish va buzish jarayonlari bilan bog‘liq masalalarni ochiq muhokama qildilar. Hokimiyat bu jarayonda aholiga barcha zarur ko‘mak berilishini ta’kidladi.
