Birlashgan Millatlar Tashkiloti ma'lumotlariga ko‘ra, iqlim o‘zgarishi natijasida dunyo o‘rmonlari jiddiy xavf ostida qolmoqda. Bu haqda Zamin.uz xabar berdi.
Yevropa, Shimoliy Amerika, Kavkaz va Markaziy Osiyoda jami 1,76 milliard gektar o‘rmon mavjud bo‘lib, bu dunyo bo‘yicha o‘rmonlarning qariyb 40 foizini tashkil etadi. Ammo hozirgi vaqtda global miqyosda salbiy jarayonlar kuzatilmoqda.
Har yili dunyo bo‘yicha taxminan 10,9 million gektar o‘rmon yo‘qolmoqda. Bunga qurg‘oqchilik, yuqori harorat, namlikning kamayishi va zararkunandalar ko‘payishi asosiy sabab sifatida ko‘rsatilmoqda.
2021-yilda o‘rmon yong‘inlari natijasida 12,6 million gektar o‘rmon yo‘q qilingan. Shuningdek, yana 73 million gektar o‘rmon hasharotlar va kasalliklar ta’sirida zarar ko‘rgan.
Mutaxassislar ushbu jarayon davom etsa, o‘rmonlar uglerod yutuvchi manba sifatida emas, balki aksincha, uglerod chiqaruvchi omilga aylanish xavfi borligini ta’kidlamoqda. BMT yetakchi davlatlarga murojaat qilib, o‘rmonlarni himoya qilish, yong‘inlarning oldini olish va tiklash dasturlarini kuchaytirishga chaqirmoqda.
O‘rmonlarni asrash nafaqat ekologiya, balki butun sayyoramiz istiqboli uchun muhim ahamiyatga ega.
