Toqayev Qozog‘istonning Avraam kelishuvlariga qo‘shilishini e’lon qiladi
Qozog‘iston Prezidenti Qosim-Jomart Toqayev AQSh Prezidenti Donald Tramp bilan Vashingtonda uchrashuv o‘tkazib, mamlakatining Avraam kelishuvlariga qo‘shilmoqchi ekanligini ma’lum qilishi kutilmoqda. Bu haqda Zamin.uz xabar berdi.
Bu haqda AQSh ma’muriyatidagi manbalarga asoslanib, Axios xabar berdi. Mazkur bayonot Toqayevning Markaziy Osiyo davlatlari yetakchilari ishtirokidagi sammit davomida e’lon qilinishi rejalashtirilgan.
Bundan tashqari, Qozog‘iston AQSh bilan strategik ahamiyatga ega bo‘lgan mineral resurslar bo‘yicha hamkorlikni mustahkamlashga oid kelishuvni ham imzoladi. Tahlilchilarning fikricha, bu harakat Vashington bilan strategik hamkorlikni yanada mustahkamlashga xizmat qiladi.
Shuningdek, Toqayev va Tramp Isroil Bosh vaziri Binyamin Netanyaxu bilan birgalikda telefon orqali muloqot qilib, Qozog‘istonning Avraam kelishuvlariga qo‘shilishini rasman tasdiqlashi kutilmoqda. AQSh rasmiylari ushbu qadamni Isroil va musulmon davlatlari o‘rtasidagi munosabatlarni yaxshilash yo‘lida muhim qadam sifatida baholamoqda.
Ularning fikricha, Avraam kelishuvlari tinchlik va mintaqaviy hamkorlikni rivojlantirishga qaratilgan jozibador tashabbus bo‘lib qolmoqda. Ma’lumotlarga ko‘ra, Avraam kelishuvlari 2020 yilda AQSh vositachiligida imzolangan bo‘lib, dastlab Birlashgan Arab Amirliklari, Bahrayn, Sudan va Marokash ushbu kelishuvlarga qo‘shilib, Isroil bilan diplomatik aloqalar o‘rnatgan.
Tramp ma’muriyati mazkur tashabbusni Isroil va Yaqin Sharq mamlakatlari o‘rtasidagi iqtisodiy va texnologik hamkorlikni rivojlantirishga yo‘naltirgan. Kelajakda Saudiya Arabistoni ham ushbu kelishuvlarga qo‘shilishi mumkinligi aytilmoqda.
Valiahd shahzoda Muhammad bin Salmonning 18-noyabr kuni AQShga tashrifi davomida bu masala muhokama qilinishi rejalashtirilgan. Biroq muzokaralar hali ham murakkab bo‘lib qolmoqda.
