Yevropa Ittifoqi (YEI) Rossiya fuqarolari uchun Shengen vizasi olish qoidalarini o‘zgartirdi. Bu haqda Zamin.uz xabar berdi.
Endilikda rossiyalik fuqarolarga ko‘p martalik viza berilmaydi. Ular har bir safar uchun alohida bir martalik viza olishlari talab qilinadi.
Mazkur qaror Yevropa Ittifoqi tomonidan Rossiya bilan avval amal qilgan vizaviy kelishuvni bekor qilish va xavfsizlik choralarini kuchaytirish maqsadida qabul qilingan. Mutaxassislarning fikricha, bu o‘zgarish Rossiya fuqarolarining Yevropaga sayohatini ancha murakkablashtiradi.
Chunki endi har bir safar uchun alohida hujjatlarni yig‘ib topshirish va konsullik yig‘imini to‘lash zarur bo‘ladi. Bungacha Rossiya fuqarolari bir yildan besh yilgacha amal qiladigan ko‘p martalik Shengen vizalarini olish imkoniyatiga ega edi.
Yangi tartibga ko‘ra, ular YEI mamlakatlariga har safar kirish uchun alohida murojaat qilishlari shart. Yevropa Ittifoqi vakillarining ta’kidlashicha, ushbu chora xavfsizlikni ta’minlash va Rossiya bilan hozirgi siyosiy munosabatlarni inobatga olgan holda joriy etilgan.
Bu qaror Rossiya fuqarolari uchun Shengen mintaqasiga sayohat qilishni ancha cheklaydi.
