Didal muzligi tog‘dan ajralib, xavf tug‘dirdi
Tojikistonning Tojikobod tumanida joylashgan Didal muzligining katta qismi tog‘dan ajralib, taxminan 5 kilometr pastga siljib tushdi. Bu haqda Zamin.uz xabar berdi.
Bu haqda mamlakat Gidrometeorologiya agentligi xabar berdi. Mutaxassislarning ma’lum qilishicha, ajralib tushgan muz bo‘lagi 1,5 kilometr uzunlikda, 200 metr kenglikda va 50 metrgacha balandlikda bo‘lgan.
Ushbu hodisa asosan so‘nggi haftalarda havo harorati ko‘tarilishi bilan bog‘liq ekani ta’kidlanmoqda. Olimlar muzlik hali ham beqaror holatda ekanini ma’lum qilishdi.
Bu esa yaqin hududlarda ko‘chki va sel xavfini oshirish ehtimolini kuchaytiradi. Tojikiston hududining 93 foizini tog‘lar tashkil qiladi.
Mamlakatda joylashgan 14 mingga yaqin muzlik Markaziy Osiyo suv resurslari uchun muhim ahamiyatga ega. Shunday ekan, Didal kabi yirik muzliklardagi o‘zgarishlar butun mintaqadagi ekologik barqarorlikka jiddiy ta’sir ko‘rsatishi mumkin.
Bu jarayonni kuzatish va xavf-xatarni o‘z vaqtida baholash muhim ahamiyat kasb etadi.
