O‘zbekistonda chiqindi suvlarni tozalash inshooti quriladi
O‘zbekistonda ekologiya va suv resurslarini muhofaza qilish bo‘yicha yangi loyiha amalga oshirilmoqda. Bu haqda Zamin.uz xabar berdi.
Xitoyning Qingyan Environmental Technology kompaniyasi mamlakatimizda sutkasiga 40 ming kub metr chiqindi suvni tozalash quvvatiga ega zamonaviy inshoot qurishni rejalashtirgan. Loyiha doirasida havo filtratsiya tizimlari va zamonaviy tozalash uskunalari o‘rnatiladi.
To‘rt bosqichli texnologik jarayon asosida ishlaydigan tizim sanoat zonalari va bo‘yoq ishlab chiqarish korxonalaridan keluvchi chiqindi suvlarni qayta ishlash imkonini yaratadi. Ushbu inshoot Yevropa ekologik standartlariga to‘liq javob beradi.
Tozalangan suvning kamida 60 foizi qayta foydalanishga yo‘naltiriladi. Shuningdek, tozalash jarayonida hosil bo‘ladigan shlam maxsus quritish tizimi orqali qayta ishlanib, elektr energiyasi ishlab chiqarishda qo‘llaniladi.
Mazkur loyiha davlat-xususiy sheriklik tamoyili asosida amalga oshiriladi. Xitoylik investorlar inshootni 15 yil davomida boshqarish va texnik xizmat ko‘rsatish majburiyatini o‘z zimmasiga oladi.
Bir kub metr suvni tozalashning narxi taxminan 1–1,2 dollarni tashkil etadi. Qurilish ishlari 8 oy ichida yakunlanishi kutilmoqda.
Bundan tashqari, Andijon viloyatining Buloqboshi tumanida O‘zbekiston va Xitoy hamkorligida qiymati 350 million dollarlik yirik sanoat majmuasi qurilishi boshlangan. Ushbu loyihada polipropilen qoplar, beton mahsulotlari va yo‘lak plitkalari ishlab chiqarish korxonalari tashkil etilishi rejalashtirilgan.
Shuningdek, Farg‘ona shahrida Xitoy kompaniyasi tomonidan qiymati 141 million dollarlik chiqindi yoqish zavodi qurilishi boshlangani ma’lum qilindi. Bu kabi loyihalar O‘zbekistonda ekologik barqarorlikni ta’minlash va qayta ishlash sohasidagi muhim qadamlar sifatida e’tirof etilmoqda.
