Qoraqalpog‘istonda sun’iy intellekt uchun soliqsiz hudud tashkil etiladi
O‘zbekistonning Qoraqalpog‘iston Respublikasi hududida sun’iy intellekt (AI) va ma’lumotlarni qayta ishlash markazlari (MQIM) bo‘yicha yangi loyihalar uchun soliqsiz hudud tashkil etilishi rejalashtirilmoqda. Bu haqda Zamin.uz xabar berdi.
Bu haqda Reuters axborot agentligi hukumat ma’lumotlariga asoslanib xabar berdi. Mazkur loyiha doirasida 100 million AQSH dollari yoki undan ortiq mablag‘ kiritishga tayyor bo‘lgan xorijiy kompaniyalar 2040-yilgacha soliqlar va bojxona to‘lovlaridan to‘liq ozod qilinadi.
Hukumat bu kompaniyalar uchun zarur infratuzilmani yaratish va elektr energiyasini imtiyozli narxlarda ta’minlashni va’da qilmoqda. Shu bilan birga, infratuzilma qurilishi qachon boshlanishi va loyihada ishtirok etishni rejalashtirayotgan kompaniyalar nomi hozircha oshkor qilinmagan.
O‘zbekiston hukumati 2030-yilga qadar AI va IT-infratuzilmasini rivojlantirish maqsadida 1 milliard dollardan ortiq xorijiy investitsiyalarni jalb qilishni mo‘ljallamoqda. Ushbu tashabbus mamlakatning raqamli texnologiyalar sohasidagi o‘sishiga xizmat qilishi kutilmoqda.
