Turkiyada zavoddagi portlashda 6 kishi halok bo‘ldi
Turkiyaning g‘arbiy qismida joylashgan Manisa viloyatida atir va kosmetika mahsulotlari ishlab chiqaruvchi zavodda kuchli portlash yuz berdi. Bu haqda Zamin.uz xabar berdi.
Dastlabki ma’lumotlarga ko‘ra, ushbu hodisa oqibatida kamida olti kishi halok bo‘lgan. Portlashdan so‘ng korxona hududida yong‘in kelib chiqqan.
Fojea ish vaqti sodir bo‘lgani bois zavoddagi qator sexlar butunlay vayron bo‘lgan. Yong‘inni o‘chirish davomida halok bo‘lgan ishchilarning jasadlari topilgan.
Hozirda favqulodda vaziyatlar xizmati va politsiya xodimlari voqea joyida ish olib bormoqda. Qidiruv-qutqaruv ishlari kuchaytirilgan tartibda davom etmoqda.
Hudud xavfsizlik maqsadida to‘liq yopilgan. Portlash natijasida atrofdagi uylar va boshqa ishlab chiqarish ob’ektlariga ham zarar yetgani ma’lum qilindi.
Hozircha zarar miqdori va portlashning aniq sabablari o‘rganilmoqda. Dastlabki taxminlarga ko‘ra, fojea ishlab chiqarish jarayonida yuz bergan kimyoviy reaksiya yoki zavod uskunalaridagi texnik nosozlik sababli sodir bo‘lgan bo‘lishi mumkin.
Manisa hokimligi halok bo‘lganlarning oilalariga chuqur hamdardlik bildirib, zavod faoliyati vaqtincha to‘xtatilganini e’lon qildi. Ushbu hodisa Turkiya jamoatchiligida katta tashvish uyg‘otdi.
Surishtiruv ishlari davom etmoqda.
