Turkiya Netanyahuga order chiqardi, Isroil norozilik bildirdi

Yaqin Sharqdagi siyosiy vaziyat yana keskinlashmoqda. Bu haqda Zamin.uz xabar berdi.

Istanbul bosh prokuraturasi tomonidan Isroil bosh vaziri Binyamin Netanyahu va yana bir qator yuqori lavozimli amaldorlarni hibsga olish bo‘yicha order chiqarilgani Isroil tomonidan keskin tanqid qilindi. Isroil tashqi ishlar vaziri Gideon Saar bu qarorni siyosiy asosga ega, deb baholadi va uni Turkiya prezidenti Rajab Toyyib Erdo‘g‘anning navbatdagi «piar spektakli» sifatida ko‘rsatdi.

Saar o‘z chiqishida Turkiya sud tizimining adolatdan uzoqlashganini, u siyosiy raqiblarga bosim o‘tkazish vositasiga aylanganini ta’kidladi. U Turkiyada jurnalistlar, merlar va sudyalar kabi ko‘plab shaxslarning huquqlari cheklanganini qayd etdi.

Shuningdek, Istanbul merining prezidentga qarshi chiqqani uchun hibsga olinishini misol qilib keltirdi va bu holat Turkiya siyosiy tizimining xolis emasligini ko‘rsatishini aytdi. 7-noyabr kuni Istanbul bosh prokuraturasi 37 nafar isroillik amaldorga, jumladan Binyamin Netanyahu, mudofaa vaziri Israel Kas va milliy xavfsizlik vaziri Itamar Ben-Gvirga qarshi hibsga olish orderi chiqargani ma’lum qilindi.

Ular G‘azo sektoridagi harakatlar sababli «genotsid va insoniyatga qarshi jinoyatlar»da ayblanmoqda. Ayrimlariga esa Falastin hududida sodir etilgan huquqbuzarliklar uchun javobgarlik yuklanmoqda.

Shuningdek, Netanyahuga nisbatan Xalqaro jinoiy sud tomonidan chiqarilgan hibsga olish orderi ham kuchda qolmoqda. Bu hujjatda Isroil bosh vaziri 2023-yil 8-oktyabrdan 2024-yil 20-maygacha bo‘lgan davrda «insoniyatga qarshi jinoyatlar va harbiy huquqbuzarliklarda» gumon qilinayotgani qayd etilgan.

Isroil tomoni bu ayblovlarni qat’iyan rad etib, Xalqaro jinoiy sud qarorlarini «siyosiylashgan va adolatsiz» deb atadi. Isroil rasmiylarining fikricha, bu urinishlar mamlakatni xalqaro miqyosda izolyatsiya qilishga qaratilgan.

Kuzatuvchilar esa bu mojaro Turkiya va Isroil o‘rtasidagi munosabatlarni yanada taranglashtirishi mumkinligini aytmoqda. Hozircha Turkiya rasmiylari bu tanqidlarga javob bermadi.