Turkiya sudi Netanyahu va qo‘mondonlarga order chiqardi
Turkiya sudi Isroil bosh vaziri Binyamin Netanyahu, mudofaa vaziri Yoav Gallant, milliy xavfsizlik vaziri Itamar Ben-Gvir, Isroil armiyasi bosh qo‘mondoni general Eyol Zamir va dengiz kuchlari qo‘mondoni David Salamani hibsga olish uchun order chiqardi. Bu haqda Zamin.uz xabar berdi.
Bu haqda Istanbul prokuraturasi ma’lumotiga asoslanib Anadolu agentligi xabar berdi. Ma’lumotlarga ko‘ra, jami 37 nafar shaxsga nisbatan ayblov qo‘yilgan.
Ular 2023 yildan buyon G‘azo hududida amalga oshirilgan harbiy harakatlar davomida "tizimli genotsid" va "insoniyatga qarshi jinoyatlar" sodir etishda ayblanmoqda. Ayblovlar orasida 6 yoshli Hind Rajabning o‘ldirilishi, 2023 yil 17 oktyabrda “Al-Ahli” baptist kasalxonasiga hujum qilinishi oqibatida 500 kishining halok bo‘lgani, 2024 yil 29 fevralda tibbiy uskunalarning ataylab vayron qilinishi va 2025 yil 21 martda Turkiya–Falastin do‘stlik kasalxonasining bombardimon qilinishi kabi holatlar keltirilgan.
Shuningdek, prokuratura G‘azo hududi to‘liq to‘sib qo‘yilgani va jabrlanganlarga gumanitar yordam yetkazilishiga to‘sqinlik qilinganini ta’kidlagan. Turkiya rasmiylari mazkur qarorni “insoniyat sha’ni va huquqlarini himoya qilish yo‘lidagi muhim qadam” sifatida talqin qilmoqda.
Shu bilan birga, Isroil hukumati bu ayblovlarga hozircha rasmiy izoh bermagan.
