Moskva metrosida ayol qizni relsga itarib yubordi
Rossiyaning poytaxti Moskva shahrida joylashgan metro stansiyalaridan birida dahshatli hodisa yuz berdi. Bu haqda Zamin.uz xabar berdi.
Ma’lum bo‘lishicha, 64 yoshli ayol 13 yoshli qizni relsga itarib yuborgan. Bu haqda Rossiya Tergov qo‘mitasi rasmiy ma’lumot berdi.
Hodisa 9-noyabr kuni “Taganskaya” metro stansiyasida sodir bo‘lgan. Poyezd kelishidan bir necha soniya oldin ayol qizchani relsga itarib yuborgan.
Qizaloq ota-onasi bilan birga bo‘lib, ular qizni o‘z vaqtida relsdan chiqarib, hayotini saqlab qolishga erishgan. Tergovchilar hodisani sodir etgan ayolning Krasnodar shahridan Moskvaga kelganligini aniqlashdi.
U qilmishini “qiz baland ovozda kulgani va unga qarab turgani sababli jahli chiqqan” deb izohlagan. Biroq rasmiylar bu izohni jiddiy qabul qilmayapti.
Ayol hozirda hibsga olingan va unga nisbatan “qotillikka suiqasd” moddasi bilan jinoyat ishi qo‘zg‘atilgan. Tergovchilar uni qamoqqa olish uchun sudga murojaat qilgan.
Politsiya ma’lumotlariga ko‘ra, ushbu ayol avval ham ommaviy joylarda turli mojarolar keltirib chiqargan bo‘lishi mumkin. Hozirda tergov ishlari davom etmoqda.
Shuni ta’kidlash joizki, bunday holatlar Rossiyada avval ham kuzatilgan. Masalan, iyul oyida Moskvadagi “Kunsevskaya” stansiyasida bir ayol mast holatdagi tanishini relsga itarib yuborgan.
O‘sha vaqtda politsiyaning tezkor harakatlari tufayli halokatning oldi olingan edi.
