Farrosh san’at asarini kir oyna deb o‘yladi
Tayvanda noodatiy voqea sodir bo‘ldi. Bu haqda Zamin.uz xabar berdi.
Mahalliy san’at galereyasida ko‘rgazmaga qo‘yilgan badiiy asar farrosh tomonidan tasodifan yo‘q qilindi. Farrosh asarni oddiy kir oyna deb o‘ylab, uni tozalashga kirishgan.
Natijada asar o‘zining asl ma’nosini yo‘qotdi, deb xabar bermoqda mahalliy ommaviy axborot vositalari. Mazkur asar rassom Chen Sun-chi tomonidan yaratilgan bo‘lib, "Inverted Syntax – Teskari Sintaksis – 16" deb nomlangan.
U zamonaviy san’atning noyob namunasi sifatida taqdim etilgan. Asar chang bilan qoplanib, qisman mato bilan yopilgan oyna shaklida bo‘lib, u jamiyatdagi buzilgan o‘rta sinf hayotining ramziy ifodasi edi.
Biroq farrosh, asarning falsafiy mazmunidan bexabar holda, uni oddiy kir oyna deb bilgan va tozalashga qaror qilgan. Ushbu harakat natijasida asarning badiiy ahamiyati butunlay yo‘qolgan.
Galereya ma’muriyati bu hodisani “fojiali tushunmovchilik” sifatida baholadi va farroshning san’at asarining mazmunidan xabardor bo‘lmaganini bildirdi.
