Britaniyada xitoylik ayol kriptovalyuta firibgarligi uchun qamaldi

Britaniyada Xitoy fuqarosi Qian Jimin, u Yadi Chjan nomi bilan ham tanilgan, 130 mingga yaqin odamni aldab, moliyaviy piramida tashkil qilgani uchun 11 yil 8 oyga ozodlikdan mahrum etildi. Bu haqda Zamin.uz xabar berdi.

Bu haqda Sky News xabar berdi. 47 yoshli ayol 2017-yilda soxta pasport bilan Xitoydan qochib kelgan.

U kriptovalyutaga asoslangan “investitsion sxema” tashkil qilib, odamlarni katta daromad va tez boyish va’dasi bilan jalb qilgan. Natijada u 40 milliard yuan, ya’ni 5,6 milliard dollardan ortiq mablag‘ yig‘ib, o‘zini “Boylik ma’budasi” deb atagan.

Tergov davomida politsiya uning yashash joyidan 61 279 bitkoin, 300 ming funt sterling naqd pul va boshqa moliyaviy hujjatlarni topgan. Bu bitkoinlarning umumiy qiymati hozirgi kunda 6 milliard dollardan oshadi va bu Britaniya tarixidagi eng katta kriptovalyuta musodarasi hisoblanadi.

Ma’lum bo‘lishicha, Qian va uning sheriklari o‘zlarini qimmatbaho zargarlik mahsulotlari bilan shug‘ullanuvchi tadbirkor sifatida tanishtirgan. Ular Londonning nufuzli hududlarida joylashgan hashamatli uylar, qimmat avtomobillar va minglab funtga teng kiyimlar sotib olishgan.

Qian 2023-yil aprel oyida York shahridagi bir Airbnb uyida qo‘lga olingan. Sud jarayonida u o‘z aybini tan olgan va faqat sarmoyadorlarning ishonchini tiklashni xohlaganini aytgan.

Ammo sudya Salli-Ann Heylz uni jinoyatni boshidan oxirigacha rejalashtirgan va boshqargan shaxs sifatida ta’riflagan. Firibgarlikda ishtirok etgan boshqa shaxslar ham jazoga tortilgan: Jian Ven 6 yil 8 oyga, Seng Hok Ling esa 4 yil 11 oyga qamalgan.

Prokurorlar firibgarlardan olingan pulning bir qismi qimmatbaho zargarlik buyumlari va hashamatli uylarni sotib olishga sarflanganini ma’lum qilishgan. Jabrlanganlarning aksariyati barcha jamg‘armasidan, hatto uyidan ham ayrilgan.

Hozirda musodara qilingan bitkoinlar taqdiri va jabrlanuvchilarga tovon to‘lash masalasi bo‘yicha qaror qabul qilinmagan.