AQShda pens ishlab chiqarilishi rasman to‘xtatildi

AQShda 1793 yildan beri ishlab chiqarilgan eng kichik tangalar – penslarning ishlab chiqarilishi rasman to‘xtatildi. Bu haqda Zamin.uz xabar berdi.

So‘nggi penslarni ishlab chiqarish marosimi Filadelfiya shahridagi zarbxonada o‘tkazildi. AQSh g‘aznachisi Brendon Bich mashinani ishga tushiruvchi tugmani bosib, oxirgi partiya tangalarni ishlab chiqardi.

Zarbxona xodimlari so‘zlariga ko‘ra, aslida ushbu tangalarning so‘nggi partiyasi iyul oyida ishlab chiqarilgan edi. Nominal qiymatidan yuqori xarajat bilan ishlab chiqariladigan boshqa tangalar, masalan, nikellar ishlab chiqarilishi davom ettiriladi.

Brendon Bichning ta’kidlashicha, penslarni ishlab chiqarishni to‘xtatish qarori sobiq AQSh Prezidenti Donald Tramp ma’muriyati tomonidan qabul qilingan zamonaviy to‘lov tizimlariga moslashish siyosati doirasida amalga oshirilgan. Shunga o‘xshash qaror oxirgi marta 1857 yilda qabul qilingan edi, o‘shanda yarim sentlik tangalar muomaladan chiqarilgan.

Bir dona pensni ishlab chiqarish narxi 3,69 sentni tashkil etgan. Hozirda amerikaliklar qo‘lida 300 milliard dona pens borligi tahmin qilinmoqda.

G‘aznachilik ma’lumotlariga ko‘ra, penslarni ishlab chiqarishni to‘xtatish orqali har yili 56 million dollar tejash imkoniyati yaratiladi. Zarbxona bergan ma’lumotlarga ko‘ra, 2024 moliyaviy yilida jami 5,6 milliard dona tanga ishlab chiqarilgan bo‘lib, ulardan 3,2 milliardini penslar tashkil qilgan.

Ishlab chiqarish to‘xtatilganiga qaramay, mavjud penslar qonuniy to‘lov vositasi sifatida muomalada qoladi.