Qirg‘izistonning Manas tumanida 8-noyabr kuni g‘aroyib voqea yuz berdi. Bu haqda Zamin.uz xabar berdi.
19 yoshli qiz o‘zidan 7 yosh katta sevgilisi bilan o‘pishish chog‘ida uning tilini tishlab, bir qismini uzib olgan. Bu haqda “Kaktus.media” xabar berdi.
Jalolobod viloyati klinik shifoxonasi direktori Qumar Botokarayevning ma’lum qilishicha, jabrlangan yigit og‘ir ahvolda kasalxonaga yotqizilgan. Uning tilining uchi va pastki labi shikastlangan.
Shifokorlarning aytishicha, jarrohlik amaliyoti o‘tkazilgan va tilni tiklash imkoniyati mavjud. Bu kabi holat o‘pishish paytida ilk bor kuzatilayotgani ta’kidlangan.
Tergov ma’lumotlariga ko‘ra, 26 yoshli yigit va 19 yoshli qiz bir to‘yda birga bo‘lib, spirtli ichimlik iste’mol qilishgan. O‘pishish paytida qiz kutilmaganda yigitning tilini tishlab olgan.
Tekshiruvlar natijasida har ikkala shaxsda ham ruhiy kasallik yoki ong buzilishi belgilari aniqlanmagan. Hozirda Manas tumani Ichki ishlar bo‘limi mazkur holat bo‘yicha jinoyat ishini qo‘zg‘atgan.
Sud-tibbiy ekspertizasi tayinlanib, tergov ishlari davom etmoqda. Eslatib o‘tamiz, yaqinda Turkiyada ham shunga o‘xshash hodisa sodir bo‘lib, u jamiyatda katta shov-shuvga sabab bo‘lgan edi.
