Energetik ichimliklar yigitni nogironlikka olib keldi
Rossiyada energetik ichimliklarni me’yordan ortiq iste’mol qilgan 22 yoshli yigit og‘ir sog‘liq muammolariga duch keldi. Bu haqda Zamin.uz xabar berdi.
Sankt-Peterburg shahrida yashovchi Artyom ismli yigit kompyuter o‘yinlariga qattiq berilib, hushyorlikni saqlash maqsadida energetik ichimliklarni ichishni odat qilgan. Dastlab u kuniga bir bankadan ichgan bo‘lsa, keyinchalik och qoringa 3–5 tagacha iste’mol qilishni boshlagan.
Natijada, bir kuni u qattiq qorin og‘rig‘i, qusish va ko‘ngil aynishi sabab shifoxonaga yotqizilgan. Shifokorlar unga pankreatit tashxisini qo‘yishgan.
Davolanishdan keyin ham kasallik qayta takrorlanib, oshqozon osti bezida kista paydo bo‘lgan. Uchinchi marta shifoxonaga yotqizilganda holati yanada og‘irlashgan.
Oshqozon osti bezida yiringli nekroz rivojlangan, organizmi zaharlangan va natijada uning oyoqlari ishlamay qolgan. Hozirda Artyom reabilitatsiya jarayonida bo‘lib, qayta yurishni o‘rganmoqda.
Mutaxassislar energetik ichimliklarni, ayniqsa och qoringa, me’yordan ortiq ichish oshqozon osti bezi, yurak va qon tomirlariga jiddiy zarar yetkazishi mumkinligini ta’kidlamoqda. Ushbu ichimliklar sog‘liq uchun xavf tug‘dirishi mumkinligini unutmaslik lozim.
