Madinada avtobus halokati: 42 kishi halok bo‘ldi
Madinada sodir bo‘lgan avtohalokat katta fojeaga sabab bo‘ldi. Bu haqda Zamin.uz xabar berdi.
Saudiya Arabistonining Madina shahri yaqinida umra ziyoratchilarini olib ketayotgan avtobus dizel yoqilg‘isi tashuvchi tankerni urib yuborishi natijasida yong‘in yuzaga kelgan. Hodisa oqibatida kamida 42 kishi halok bo‘lgani ma’lum qilindi.
Bu haqda “Hindustan Times” xabar berdi. Halok bo‘lganlar orasida Hindistonning Haydarobod shahridan bo‘lgan 16 nafar fuqaro ham borligi aniqlangan.
Avtobusning to‘liq yonib ketishi sababli jabrlanganlarning shaxsini aniqlash ishlari hali ham davom etmoqda. Rasmiylar bu jarayonning murakkabligini ta’kidlamoqda, chunki avariya juda kuchli bo‘lgan.
Dastlabki ma’lumotlarga ko‘ra, fojea mahalliy vaqt bilan soat 01:30 atrofida, Madinadan 160 kilometr uzoqlikda joylashgan Mufrihat shahri hududida sodir bo‘lgan. Avtobusda jami 43 nafar yo‘lovchi bo‘lib, ulardan faqat bir kishi tirik qolganligi taxmin qilinmoqda.
Hindiston Tashqi ishlar vaziri Subrahmanyam Jaishankar ushbu fojeadan chuqur qayg‘uda ekanini bildirib, halok bo‘lganlarning oilalariga hamdardlik izhor etdi. Shuningdek, Riyoddagi Hindiston elchixonasi va Jiddadagi konsulxona jabrlanganlarga zarur yordam ko‘rsatish uchun ish olib borayotganini ma’lum qildi.
Fojeadan keyin Hindistonning Jiddadagi elchixonasi maxsus ishonch telefoni tashkil etdi. Haydarobod deputati Asaduddin Ovaysi ham elchixona bilan bog‘lanib, halok bo‘lganlarning shaxsini aniqlash va jasadlarni Hindistonga qaytarish jarayonini tezlashtirishni so‘radi.
U o‘z chiqishida jabrlanganlarga zudlik bilan tibbiy yordam ko‘rsatish va marhumlarning jasadlarini Vatanga qaytarish muhimligini ta’kidladi.
