To‘qayev Mirziyoyevga samimiy mehmondo‘stlik uchun minnatdorlik bildirdi
Qozog‘iston Respublikasi Prezidenti Qosim-Jomart To‘qayev O‘zbekiston Prezidenti Shavkat Mirziyoyevga minnatdorlik maktubi yo‘lladi. Bu haqda Zamin.uz xabar berdi.
Oqo‘rda xabariga ko‘ra, To‘qayev o‘z maktubida 14–16 noyabr kunlari O‘zbekistonga amalga oshirgan davlat tashrifi davomida ko‘rsatilgan samimiy mehmondo‘stlik uchun chuqur minnatdorlik bildirgan. To‘qayev mazkur tashrifning tarixiy ahamiyatga ega ekanini alohida ta’kidlab, bu tashrif Qozog‘iston va O‘zbekiston o‘rtasidagi strategik sheriklik va do‘stona munosabatlarni yanada mustahkamlashga xizmat qilganini qayd etgan.
Shuningdek, Qozog‘iston rahbari Toshkent shahrida o‘tkazilgan Markaziy Osiyo davlatlari rahbarlarining VII Maslahat uchrashuvi yuqori darajada tashkil etilganini e’tirof etgan. To‘qayevning fikricha, mintaqaviy hamkorlikning turli yo‘nalishlari bo‘yicha olib borilgan muhokamalar, qabul qilingan muhim qaror va hujjatlar forumning dolzarbligini oshirgan.
Shuningdek, Ozarbayjonning to‘la huquqli ishtirokchi sifatida qo‘shilishi forumning strategik ahamiyatini yanada kuchaytirgan.
