AQSH Datavice kompaniyasini sanksiyalar ro‘yxatiga kiritdi
AQSH Moliya vazirligining Tashqi aktivlarni nazorat qilish boshqarmasi (OFAC) O‘zbekistonda faoliyat olib borayotgan Datavice kompaniyasini “qora ro‘yxat”ga kiritdi. Bu haqda Zamin.uz xabar berdi.
Rasmiy ma’lumotlarga ko‘ra, bu qaror Rossiyaning raqamli sektori bilan bog‘liq ayrim kompaniyalarga nisbatan sanksiyalarni kengaytirish doirasida qabul qilingan. 19-noyabr kuni AQSH bir qator kompaniya va shaxslarni kiberhujumlarda ishtirok etgani hamda cheklovlarni aylanib o‘tishda yordam bergani uchun yangi sanksiyalar bilan jazoladi.
Bu choralar CAATSA qonuni va Ukrainadagi vaziyatga munosabat tarzida qabul qilingan keng qamrovli sanksiyalar tizimining bir qismi hisoblanadi. Datavice kompaniyasi 2023-yil iyul oyida Toshkentda tashkil etilgan bo‘lib, 31-iyuldan buyon IT-Park rezidenti sifatida faoliyat yuritmoqda.
Kompaniyaning ustav kapitali 24 million so‘mni tashkil etadi. Orginfo ma’lumotlariga ko‘ra, Maksim Makarov kompaniyaning asoschisi, rahbari va bosh hisobchisi sifatida ko‘rsatilgan.
OFACning qaroriga ko‘ra, Datavice va sanksiya ro‘yxatiga kiritilgan boshqa tashkilotlarning AQSH yurisdiksiyasidagi barcha aktivlari muzlatiladi. Shuningdek, ular bilan bog‘liq har qanday moliyaviy operatsiyalar qat’iyan taqiqlanadi.
Bu qoidalarni buzganlarga ikkinchi darajali sanksiyalar ham qo‘llanilishi mumkin. Yangilangan ro‘yxatda Datavice bilan birga quyidagi kompaniyalar ham bor: Media Land, ML.Cloud, Kirishi, Media Land Technology (Rossiya), Hypercore (Buyuk Britaniya) va Smart Digital Ideas Doo Cyber4 (Serbiya).
Shuningdek, ushbu tashkilotlar bilan bog‘liq besh nafar rossiyalik fuqaro ham cheklov ostiga tushgan. AQSH texnologik imkoniyatlarning harbiy maqsadlarda yoki sanksiyalardan chetlab o‘tishda foydalanilayotganini ta’kidlab, nazorat choralari kuchaytirilishini ma’lum qilgan.
Ushbu qaror mintaqadagi raqamli soha rivojiga salmoqli ta’sir ko‘rsatishi kutilmoqda.
