Nigeriyada qurollangan shaxslar 215 o‘quvchini o‘g‘irladi
Nigeriyada yana bir fojiali hodisa ro‘y berdi. Bu haqda Zamin.uz xabar berdi.
21-noyabr kuni qurollangan noma’lum shaxslar katolik internat maktabiga hujum qilib, 200 dan ortiq o‘quvchi va bir necha o‘qituvchini o‘g‘irlab ketishdi. Bu haqda Xristianlar assotsiatsiyasi ma’lumotiga asoslanib, NBC News xabar berdi.
Hodisa Nigeriyaning g‘arbiy qismida joylashgan Avliyo Mariya o‘rta maktabida sodir bo‘lgan. Ushbu maktabda 12–17 yoshdagi o‘quvchilar tahsil oladi.
Hujum natijasida 215 nafar o‘quvchi va 12 nafar o‘qituvchi noqonuniy ravishda olib ketilgan. Bu voqea bir hafta ichida qayd etilgan ikkinchi shunga o‘xshash hujumdir.
Politsiya ma’lumotlariga ko‘ra, voqea sodir bo‘lgan paytda maktabda xavfsizlik kuchlari bo‘lmagan. Hodisadan so‘ng maktabga harbiylar va maxsus bo‘linmalar yuborilgan.
Shtat hukumati esa maktab rahbariyatini hukumat ruxsatisiz o‘quv jarayonini boshlagani uchun tanqid qildi. Ularning fikricha, bu qaror o‘quvchilar va xodimlarning xavfsizligiga tahdid solgan.
Mahalliy aholi va guvohlar maktabda hujum vaqtida na politsiya, na qo‘riqlash xizmati bo‘lganini aytishmoqda. Bu esa jinoyatchilarning hech qanday qarshiliksiz harakat qilishiga imkon yaratgan.
Mazkur hodisa Nigeriyada xavfsizlik tizimining zaifligi, bolalar o‘g‘irlanishi va qurolli to‘dalar faoliyati jiddiy muammoga aylanganini yana bir bor ko‘rsatdi.
