45 yildan so‘ng yo‘qolgan erkak oilasini topdi
Hindistonda yuraklarga ta’sir qiluvchi, ammo umid baxsh etuvchi voqea ro‘y berdi. Bu haqda Zamin.uz xabar berdi.
45 yil avval bedarak yo‘qolgan Rikhi ismli erkak, uzoq vaqt o‘tgach, o‘z oilasini topishga muvaffaq bo‘ldi. Ushbu voqea haqida “Times of India” nashri xabar berdi.
Ma’lum bo‘lishicha, Rikhi Himachal-Pradesh shtatining Sirmaur tumanidagi Nadi qishlog‘ida tug‘ilgan. U 1980-yilda uyini tark etib, Haryana shtatining Yamunanagar shahrida joylashgan mehmonxonada ishlay boshlagan.
Ammo ko‘p o‘tmay, og‘ir avtohalokatga uchragan va bosh miya jarohati tufayli xotirasini yo‘qotgan. Natijada uning ota-onasi Rikhi tirik qolganiga ishonmay, uni yo‘qotgan deb bilishgan.
Rikhi keyinchalik Mumbay shahriga ko‘chib o‘tgan va u yerda o‘zini Ravi Chaudhary deb tanishtirgan. U yangi hayot boshlagan, oila qurib yashagan va o‘tmishini butkul unutgan.
Ammo yaqinda taqdir uni yana sinovga soldi: boshiga qayta jarohat olgach, bolalik xotiralari asta-sekin tiklana boshladi. Xotinining yordami bilan Rikhi o‘z kelib chiqishini aniqlashga harakat qildi va tug‘ilgan qishlog‘ini izlab topishga qaror qildi.
15-noyabr kuni u 1600 kilometr masofani bosib o‘tib, Nadi qishlog‘idagi uyiga qaytib bordi. Uni eshikda uzoq yillar davomida yo‘qotganiga ishongan aka-uka va opa-singillari qarshi oldi.
45 yillik ayriliqdan so‘ng uchrashuv quvonch va ko‘z yoshlarga to‘la bo‘ldi. Bu voqea oila uchun og‘ir yo‘qotish va intizorlikka nihoya yasadi.
