NATO O‘rtayer dengizida "Neptun zarbasi" mashqlarini boshladi
NATO O‘rtayer dengizida yirik harbiy mashqlarni boshladi. Bu haqda Zamin.uz xabar berdi.
Alyans tomonidan tashkil etilgan ushbu mashg‘ulotlar "Neptun zarbasi" deb nomlanib, Italiya sohillari yaqinida o‘tkazilmoqda. Mashqlar NATO uchun strategik ahamiyatga ega bo‘lib, mintaqada xavfsizlikni ta’minlash va kuchayib borayotgan geosiyosiy keskinliklarga javob berish maqsadida amalga oshirilmoqda.
Ma’lumotlarga ko‘ra, harbiy mashqlarda Buyuk Britaniyaning HMS Prince of Wales avianosetsi ishtirok etmoqda. Uning bortida 26 ta AQShning F-35 qiruvchi samolyotlari joylashgan.
Mashqlarda AQSh, Buyuk Britaniya, Polsha, Turkiya kabi davlatlar va yana jami 10 ga yaqin mamlakat harbiylari qatnashmoqda. Mashqlar davomida NATO a’zolari sharqiy flangga ehtimoliy hujum vaziyatida qanday harakat qilishni mashq qilmoqda.
Shuningdek, jahon bo‘ylab tashiladigan neft oqimining 30 foizini tashkil etuvchi muhim dengiz yo‘llarini himoya qilish masalasi ham ko‘rib chiqilmoqda. NATOning Yevropa qo‘shma qo‘shinlari oliy qo‘mondonligi rahbari Aleksus Grinkevichning so‘zlariga ko‘ra, alyans 2027-yilga kelib Rossiya va Xitoy bilan yuzaga kelishi mumkin bo‘lgan ehtimoliy to‘qnashuvlarga tayyor bo‘lishi lozim.
Uning ta’kidlashicha, so‘nggi yillarda NATO davlatlari havo hududlari buzilishi bilan bog‘liq holatlarning ko‘paygani sababli bunday mashg‘ulotlar dolzarb ahamiyat kasb etmoqda. Masalan, 2025-yil 10-sentyabr kuni Polsha harbiylari mamlakat havo chegarasini 21 ta masofadan boshqariladigan dron buzganini ma’lum qilgan.
Polsha bosh vaziri Donald Tusk ushbu holatda Rossiyani ayblagan. Shuningdek, Estoniya ham shu oyda uchta dron orqali havo hududi buzilganini bildirgan va bu uchun Rossiyani javobgar deb hisoblagan.
Moskva esa barcha ayblovlarni rad etmoqda.
