Nigeriyada 303 o‘quvchi qiz o‘g‘irlab ketildi

Nigeriyada yana bir daxshatli odam o‘g‘irlash hodisasi yuz berdi. Bu haqda Zamin.uz xabar berdi.

Xristianlar assotsiatsiyasi bergan ma’lumotga ko‘ra, mamlakatning Niger shtati Papiri qishlog‘ida joylashgan katolik maktab-internatiga noma’lum shaxslar hujum uyushtirgan. Ushbu voqea 21-noyabrga o‘tar kechasi sodir bo‘lgan.

Hujum paytida qurollangan jinoyatchilar maktab hududiga bostirib kirib, qo‘riqchini otib o‘ldirgan va 303 nafar o‘quvchi qiz hamda 12 nafar o‘qituvchini zo‘rlik bilan olib ketgan. Hozirda mamlakat xavfsizlik kuchlari o‘quvchi qizlarni qidirish ishlarini davom ettirmoqda.

Ushbu fojea ortidan ko‘plab ta’lim muassasalari xavfsizlik sababli vaqtincha yopilgan. Prezident Bola Tinubu yuzaga kelgan jiddiy vaziyat tufayli Janubiy Afrikada o‘tayotgan G20 sammitidagi ishtirokini bekor qildi.

Nigeriyada odam o‘g‘irlash muammosi yillar davomida chuqurlashib bormoqda. Bir necha kun avval Kebbi shtatida 25 nafar o‘quvchi qiz internatdan o‘g‘irlab ketilgan edi.

Shuningdek, Kvara shtatida cherkovga uyushtirilgan hujum natijasida 38 kishi garovga olingan. Jinoyatchilar odatda har bir o‘g‘irlangan shaxs uchun 100 million nayra miqdorida tovon puli talab qilmoqda.

Mamlakatda faoliyat yurituvchi qurolli guruhlar, ayniqsa, shimoli-g‘arb va markaziy hududlarda keng tarqalgan bo‘lib, minglab odamlarni o‘g‘irlashda davom etmoqda. Eng mashhur voqealardan biri 2014-yilda sodir bo‘lib, “Boko Haram” guruhi Chibok shahridagi maktabdan 276 nafar o‘quvchi qizni olib qochgan edi.

Ularning 82 nafari hozirgacha topilmagan. Oxirgi haftalarda vaziyat yanada keskinlashdi.

AQShning sobiq prezidenti Donald Tramp Nigeriyada nasroniylar o‘ldirilishiga hukumat yetarli chora ko‘rmayotganini tanqid qilgan. Prezident Tinubu esa bu ayblovlarni rad etib, mamlakatdagi vaziyatni nazorat qilayotganini ta’kidlagan.

Ushbu voqea Nigeriyada xavfsizlik tizimi jiddiy sinovdan o‘tayotganini yana bir bor ko‘rsatmoqda.