Xarkivga hujum: 4 kishi halok, 17 kishi jarohatlandi
Rossiya qo‘shinlari 24-noyabrga o‘tar kechasi Ukraina hududidagi ikkinchi yirik shahar — Xarkivga ommaviy hujum uyushtirdi. Bu haqda Zamin.uz xabar berdi.
Viloyat harbiy ma’muriyati rahbari Oleg Sinegubovning ma’lum qilishicha, tinch aholi yashaydigan hududlarga "Geran-2" turidagi uchuvchisiz uchish apparatlari yordamida zarbalar berilgan. Dastlabki ma’lumotlarga ko‘ra, jami 16 ta portlash qayd etilgan.
Hujum natijasida Xarkivning Shevchenko va Saltovka tumanlaridagi turar joy binolari katta zarar ko‘rdi. Uch nafar tinch aholi halok bo‘ldi: 61 va 41 yoshli ayollar hamda 55 yoshli erkak.
Shuningdek, jabrlanganlar orasida ikki nafar bola bor. 12 yoshli o‘g‘il bola shisha sinig‘i tufayli jarohatlangan, 11 yoshli qiz esa ruhiy zarba olgan.
Xarkiv meri Igor Terexovning xabar berishicha, qutqaruvchilar xususiy uylarning vayronalari orasidan yana bir fuqaroning jasadini topishgan. Natijada, qurbonlar soni to‘rt nafarga yetdi.
Jabrlanganlar soni esa 17 nafarni tashkil qilmoqda. Hozirda qutqaruv ishlari davom etmoqda.
Vayronalar ostida qolgan fuqarolar bor-yo‘qligini aniqlash ustida ish olib borilmoqda. Viloyat rahbari Sinegubov hujum oqibatlarini aks ettiruvchi suratlarni e’lon qilib, vayronagarchilikning keng miqyosda ekanini ta’kidladi.
