Germaniya Isroilga qurol yetkazish taqiqini bekor qildi

Germaniya hukumati avgust oyida Isroilga qurol-yarog‘ yetkazib berishga qo‘yilgan taqiqni rasman bekor qildi. Bu haqda Zamin.uz xabar berdi.

DPA axborot agentligining xabar berishicha, ushbu qaror 24-noyabrdan kuchga kiradi. Hukumat vakili Shtefan Korneliusning ma’lum qilishicha, ayrim turdagi qurollarga nisbatan cheklovlar bugungi geosiyosiy vaziyatda o‘z ahamiyatini yo‘qotgan.

Mazkur qarorning qabul qilinishiga 10-oktabrdan boshlab kuchga kirgan Isroil va HAMAS o‘rtasidagi o‘t ochishni to‘xtatish kelishuvi asosiy sabab sifatida ko‘rsatilgan. Korneliusning qo‘shimcha qilishicha, bu qaror mintaqadagi vaziyatning nisbatan barqarorlashgani hisobga olingan holda qabul qilingan.

Avvalroq G‘azo hududidagi harbiy harakatlar Germaniyada jiddiy noroziliklarga sabab bo‘lgan edi. Jamoatchilik tomonidan bu harakatlar genotsid sifatida baholangandi.

Shu sababli hukumat Isroilga qurol yetkazib berishni vaqtincha to‘xtatgan edi. Endilikda, vaziyatni tahlil qilgan holda, Berlin rasmiylari cheklovlarni bekor qilishga qaror qildi.