Saudiya Arabistonida yana ikki alkogol do‘koni ochiladi
Saudiya Arabistonida yana ikki alkogol mahsulotlari do‘koni ochilishi rejalashtirilmoqda. Bu haqda Zamin.uz xabar berdi.
Bu haqda Reuters xabar berdi. Yangi do‘konlardan biri sharqiy viloyat Dahron shahrida, davlatga qarashli Aramco neft kompaniyasi hududida quriladi.
Ushbu do‘konga faqat musulmon bo‘lmagan shaxslar kirishi mumkin bo‘ladi. Ikkinchi do‘kon esa port shahri Jiddada barpo etilmoqda.
Bu do‘kon asosan musulmon bo‘lmagan diplomatlar uchun mo‘ljallangan bo‘lib, ushbu hududda ko‘plab xorijiy konsulliklar joylashgan. Mazkur tashabbus Saudiya Arabistoni valiahd shahzodasi Muhammad bin Salmonning mamlakatni ochish va cheklovlarni yengillashtirish siyosati doirasida amalga oshirilayotgan navbatdagi qadamdir.
Ma’lumki, o‘tgan yili Riyod shahrida so‘nggi 73 yil ichida ilk bor diplomatlar uchun mo‘ljallangan alkogol mahsulotlari do‘koni ochilgan edi. Yangi ochiladigan savdo nuqtalari esa qirollikda qat’iy taqiqlangan spirtli ichimliklar savdosiga mo‘ljallangan ikkinchi va uchinchi do‘konlar bo‘lib, mamlakatdagi muayyan cheklovlarni asta-sekin yumshatish jarayonining bir qismi sifatida ko‘rilmoqda.
