Tehronda havo iflosligi sabab maktablar yopildi
Eronning poytaxti Tehron shahrida havoning keskin ifloslanishi sababli 24–25-noyabr kunlari barcha maktablar va oliy ta’lim muassasalari vaqtincha yopildi. Bu haqda Zamin.uz xabar berdi.
Bu qaror aholi salomatligini himoya qilish maqsadida qabul qilingan. Mahalliy mutasaddilarning ma’lumotiga ko‘ra, havo sifati yomonlashgani sabab fuqarolarga imkon qadar ochiq havoga chiqmaslik, himoya niqoblaridan foydalanish va ehtiyot choralariga rioya qilish tavsiya etilmoqda.
Havo sifatini nazorat qilish tashkiloti bergan ma’lumotga ko‘ra, 2025-yil boshidan hozirgacha Tehronda atigi 6 kun davomida toza havo kuzatilgan. Bu esa shaharda ekologik vaziyatning jiddiyligidan dalolat beradi.
IQAir xalqaro platformasining reytingiga ko‘ra, ayni vaqtda Tehron dunyodagi eng iflos havoga ega poytaxtlar orasida 10-o‘rinni egallab turibdi. Shu bilan birga, O‘zbekiston poytaxti Toshkent shahri ham ushbu reytingda yuqoridan joy olib, 8-o‘rinda qayd etilgan.
Mutaxassislar atrof-muhitni muhofaza qilish va ekologik vaziyatni yaxshilash bo‘yicha chora-tadbirlarni kuchaytirish zarurligini ta’kidlamoqda.
