Jahon ommaviy axborot vositalari so‘nggi kunlarda AQSh va Rossiya vakillari tomonidan tayyorlangan, deb aytilayotgan 28 banddan iborat “tinchlik rejasi”ni faol muhokama qildi. Bu haqda Zamin.uz xabar berdi.
Ushbu hujjat 2022 yilgi Istanbul kelishuvlari loyihasiga nisbatan Ukraina manfaatlariga mos kelmayotgani, aksincha, Rossiya uchun yangi imtiyozlarni o‘z ichiga olgani sababli Yevropa va Ukraina tomonidan keskin tanqidga uchradi. Reja mazmunidan ko‘ra uning muallifi kimligi bo‘yicha ko‘plab savollar tug‘ildi.
Ayrim senatorlar AQSh Davlat kotibi Marko Rubio ushbu hujjatni Vashington emas, balki Rossiya manfaatlariga xizmat qiluvchi hujjat sifatida baholaganini ta’kidladilar. Ammo Davlat departamenti va Marko Rubio bu da’volarni rad etib, rejani AQSh tomonidan ishlab chiqilganini ma’lum qildi.
CNN bu holatni noqulay va murakkab vaziyatga aylanishi mumkin bo‘lgan masala sifatida ko‘rsatdi. Britaniyaning The Guardian nashri esa reja matnidagi ayrim iboralar ingliz tiliga rus tilidan so‘zma-so‘z tarjima qilinganiga o‘xshashligini qayd etdi.
Jumladan, “It is expected” (kutiladi) kabi jumlalar rus tilidagi “ojidayetsya” fe’lidan noqulay tarzda o‘girilgan, deb baholandi. Shuningdek, hujjatda Ukraina hududlari “yangi hududlar” deb atalishi ham shubhalarni kuchaytirdi.
Jenevada o‘tgan muzokaralarda ushbu reja muhokama qilinib, dastlabki 28 bandli hujjat 19 bandgacha qisqartirildi. Yangi tahrirda Ukraina Qurolli Kuchlari sonini qisqartirish, Rossiyaning muzlatilgan aktivlaridan mablag‘ ajratish kabi bahsli bandlar olib tashlandi.
Ukraina prezidenti ofisi maslahatchisi Aleksandr Bevz muhim masalalar bo‘yicha yakuniy qarorlarni prezidentlar Tramp va Zelenskiy qabul qilishi kerakligini ta’kidladi. Biroq Kreml 28 bandli dastlabki loyihani yagona maqbul variant sifatida ko‘rib, yangilangan 19 bandli rejani rad etdi.
