O‘zbekistonda avtomobil sanoati uchun yangi hamkorliklar
2025-yil 27-29-oktyabr kunlari Koreya Respublikasida ADM Global kompaniyalar guruhi tomonidan 2025 Supplier Board Workshop xalqaro seminari tashkil etildi. Bu haqda Zamin.uz xabar berdi.
Ushbu tadbirda Kia Corporation rahbariyati, shuningdek, Koreyaning 13 ta avtomobil qismlari ishlab chiqaruvchi kompaniyalari va O‘zbekistonning 17 ta lokalizatsiya korxonalari vakillari, jami 80 dan ortiq rahbarlar ishtirok etdi. Seminar avtomobil qismlari ta’minotchilari bilan hamkorlikni mustahkamlash, tajriba almashish va yangi qo‘shma loyihalar imkoniyatlarini muhokama qilishga bag‘ishlandi.
Tadbir davomida ishtirokchilar rivojlanishning asosiy yo‘nalishlari, jumladan, O‘zbekistonda lokalizatsiyani kengaytirish va sanoat klasterlarini rivojlantirish rejalari yuzasidan fikr almashdilar. Shuningdek, amaldagi va potensial ta’minotchilar bilan muzokaralar o‘tkazilib, hamkorlikning yangi yo‘nalishlari hamda texnologik rivojlanish imkoniyatlari ko‘rib chiqildi.
Seminar doirasida lokalizatsiya rivoji va ta’minot zanjirlarining barqarorligini ta’minlashga katta hissa qo‘shgan kompaniyalarni mukofotlash marosimi ham tashkil etildi. Kia Corporation “Global Impact Award” mukofotiga sazovor bo‘ldi.
Ushbu mukofot kompaniyaning O‘zbekiston avtomobil sanoatining xalqaro o‘sishiga qo‘shgan hissasi uchun topshirildi. Seminar ADM Global, Kia Corporation va koreyalik hamda o‘zbek avtomobil qismlari ishlab chiqaruvchilari o‘rtasidagi uzoq muddatli hamkorlikni rivojlantirish yo‘lida muhim qadam bo‘ldi.
Tadbir davomida yangi qo‘shma loyihalarni ishga tushirish va qo‘shimcha investitsiyalarni jalb qilish bo‘yicha kelishuvlarga erishildi. ADM Global vakillari bunday tadbirlar avtomobil sanoati rivoji va O‘zbekistonning mintaqaviy avtomobil qismlari ta’minot zanjirida muhim o‘rin egallashi uchun zarur omillar ekanini ta’kidladilar.
Ushbu format 2026-yilda davom ettirilishi va yanada kengaytirilishi rejalashtirilgan.
