Rossiyaning Vladimir viloyatida yuz bergan qotillik hodisasi jamoatchilik e’tiborini tortdi. Bu haqda Zamin.uz xabar berdi.
Ma’lum bo‘lishicha, 48 yoshli ayol O‘zbekiston fuqarosini bo‘g‘ib o‘ldirgan va jasadini o‘z hovlisidagi daraxt ostiga ko‘mgan. Bu haqda viloyat Tergov qo‘mitasi xabar berdi.
Rasmiy ma’lumotlarga ko‘ra, 54 yoshli marhum bir necha yil davomida Pokrovskiy TBI zavodida ishlagan. 2025-yilning noyabr oyida uning yo‘qolib qolgani haqida qarindoshlari huquq-tartibot idoralariga murojaat qilgan.
Tergov natijalariga ko‘ra, erkak 16-noyabr kuni Petushinskiy tumanidagi Staroye Perepechino qishlog‘ida yashovchi tanish ayolining uyiga borgan. Dastlabki ma’lumotlarga ko‘ra, ular uchrashuv chog‘ida spirtli ichimlik iste’mol qilishgan, so‘ngra o‘rtalarida janjal kelib chiqqan.
Aytilishicha, erkak polga yiqilib tushgan, ayol esa uni arqon bilan bo‘g‘ib o‘ldirgan. Qotillikdan so‘ng ayol jasadni hovlisidagi olma daraxti ostiga ko‘mib qo‘ygan.
Tergov materiallariga ko‘ra, mojaroning sababi qarz masalasi bo‘lgan. Ayol erkakdan pul so‘ragan, biroq erkak bunga rozi bo‘lmagan.
Marhumning qarindoshlari ayolning oldindan katta qarzi borligi va o‘zbekistonlik mehnat migrantining o‘z pulini qaytarib olish uchun qishloqqa borgani haqida ijtimoiy tarmoqlarda ma’lumot bergan. Shuningdek, ayol jabrlanuvchining telefoni va bank kartasini ham olib ketgani aniqlangan.
Tergovchilar ayolning uyini ko‘zdan kechirish jarayonida bir qator ashyoviy dalillarni topishgan. Ma’lumotlarga ko‘ra, gumonlanuvchi ilgari ham jinoyat sodir etgani uchun sudlangan.
Hozirda tergov davom etmoqda, ayolga nisbatan qamoqqa olish ehtiyot chorasi qo‘llanilishi kutilmoqda. Ekspertizalar tayinlangan va voqeaning barcha tafsilotlari o‘rganilmoqda.
