Kaspiy quvuri hujumi Qozog‘istonga 1,5 milliard dollar zarar yetkazdi

Qozog‘iston Kaspiy quvuri konsorsiumi (KTK)ga qilingan hujum oqibatida kamida 1,5 milliard dollar zarar ko‘rgani ma’lum qilindi. Bu haqda Zamin.uz xabar berdi.

Bu haqda energetika sohasi eksperti Oljas Baydildinov RITV telekanaliga bergan intervyusida ma’lum qildi. Unga ko‘ra, ushbu zarar Qozog‘istonning yirik shaharlaridan biri – Ostona yoki Olmaota shaharlarining yillik byudjetiga teng.

Baydildinovning so‘zlariga ko‘ra, KTK orqali neft asosan Yevropa bozorlariga yetkazib beriladi. Konsorsium oyiga olti million tonnadan ortiq neft tashiydi, bu hajmning 90 foizi Qozog‘istondan eksport qilinayotgan neftga to‘g‘ri keladi.

Mutaxassis ta’kidlaganidek, bu Qozog‘iston nefti emas, balki mamlakat hududidan o‘tuvchi eksport neftidir. Qozog‘iston Energetika vazirligining ma’lumotiga ko‘ra, 29-noyabr kuni KTK infratuzilmasiga dengiz dronlari yordamida hujum qilingan.

Natijada neft kompleksi uskunalari jiddiy zarar ko‘rgan. Vazirlik bu kabi fuqarolik obyektlariga hujumlarni nomaqbul deb atab, bunday holatlar global energiya xavfsizligiga tahdid solishini ta’kidladi.

Hukumat esa yuzaga kelgan vaziyatga javoban neft eksportini muqobil yo‘nalishlarga zudlik bilan yo‘naltirish rejasini ishga tushirdi.