Xirosimada o‘zbek taomlari restorani va savdo uyi ochildi
Yaponiyaning Xirosima shahrida o‘zbek milliy taomlari restorani va Namangan viloyatining savdo uyi ochildi. Bu haqda Zamin.uz xabar berdi.
Ushbu loyiha hududiy brendlarni targ‘ib qilish hamda savdo va madaniy aloqalarni rivojlantirishni maqsad qilgan. Restoranda yaponiyalik mehmonlarga o‘zbek oshxonasining an’anaviy taomlari, jumladan, palov, somsa, sho‘rva, lag‘mon va qozon-kabob taqdim etiladi.
Namangan viloyatining savdo uyi esa sanoat, qishloq xo‘jaligi, to‘qimachilik, hunarmandchilik mahsulotlari va gastronomik brendlarni targ‘ib qilish uchun asosiy maydon sifatida faoliyat yuritadi. Mazkur loyiha ikki davlat tadbirkorlari o‘rtasida yangi eksport yo‘nalishlarini rivojlantirish va bevosita hamkorlik aloqalarini yo‘lga qo‘yishga xizmat qiladi.
Ushbu tashabbus o‘zbek milliy oshxonasi va mahsulotlarini xalqaro miqyosda tanitish, shuningdek, savdo aloqalarini mustahkamlashga qaratilgan muhim qadam bo‘lib, ikki davlat o‘rtasidagi iqtisodiy va madaniy hamkorlikni mustahkamlashda katta ahamiyat kasb etadi.
