Quyoshda kuchli chaqnash: Yerga ta’sir ehtimoli bor
1-dekabr kuni Rossiya Fanlar akademiyasining Koinot tadqiqotlari instituti Quyoshda X sinfiga mansub kuchli chaqnash ro‘y berganini qayd etdi. Bu haqda Zamin.uz xabar berdi.
Ma’lum qilinishicha, X1.9 darajasidagi chaqnash Toshkent vaqti bilan soat 7:49 da sodir bo‘lgan. Ushbu chaqnash Quyoshning 4274-raqamli faol hududida kuzatilgan bo‘lib, bu hudud ikki oydan beri Quyosh faolligining eng yuqori darajalarini namoyon qilmoqda.
Ta’kidlash joizki, ushbu mintaqa noyabr oyining boshida beshta X sinfga mansub portlash manbai bo‘lgan, ularning ikkisi yilning eng kuchli portlashlari sifatida qayd etilgan edi. Quyosh o‘z aylanishini davom ettirar ekan, ushbu mintaqa Yerga yaqinlashib, yuqori faollikni saqlab qolgan.
Shuningdek, Quyoshning janubiy yarimsharida joylashgan 4294-raqamli yana bir faol zona ham kuzatilmoqda. Olimlarning fikricha, bu holat dekabr oyini Quyosh faolligi bo‘yicha eng yuqori ko‘rsatkichlarga ega davrlardan biriga aylantirishi mumkin.
Hozirgi paytda Quyoshdan chiqayotgan plazma oqimlari Yerga sezilarli ta’sir ko‘rsatmayotgani ma’lum. Ammo mutaxassislar 4-dekabrga qadar bu chaqnashlarning Yer magnitosferasiga ta’sir ehtimolini istisno qilmayapti.
