Hindistonda erkak uylanish talabidan qutulish uchun qotillik qildi
Hindistonda taksi haydovchisi o‘ziga turmush qurishni talab qilgan sevgilisini o‘ldirganligi haqida xabar tarqaldi. Bu haqda Zamin.uz xabar berdi.
Bu voqea Maxarashtra shtatida sodir bo‘lgan bo‘lib, jinoyat tafsilotlarini The Times of India nashri yoritdi. Ma’lum bo‘lishicha, 33 yoshli erkak 26 yoshli ayol bilan bir necha yildan beri munosabatda bo‘lgan.
Ayol undan uylanishni talab qilgan, ammo erkak boshqa ayolga uylangani sabab bu munosabatni tugatmoqchi bo‘lgan. 2025-yilning 26-noyabr kuni ayol o‘g‘lini maktabga olib borgach, sevgilisi bilan uchrashgan.
Erkak uni o‘z qishlog‘iga olib borishni va’da qilgan, lekin shahardan tashqariga olib chiqib, bo‘g‘ib o‘ldirgan va temir truba bilan kaltaklagan. So‘ngra avtomobilidan benzin chiqarib, uning jasadini yoqib yuborgan.
27-noyabr kuni politsiya ayolning qisman kuygan jasadini topgan. Dastlab gumonlanuvchi jinoyatni rad etgan, ammo so‘roq davomida ayolni o‘ldirganini tan olgan.
Erkakning so‘zlariga ko‘ra, u sevgilisining uylanish talabi va bosimidan qutulish uchun bu jinoyatni sodir etgan. Politsiya tomonidan erkak hibsga olingan va unga nisbatan tergov ishlari olib borilmoqda.
