Fransiya maktablarida telefon taqiqi kengaytiriladi

Fransiya prezidenti Emmanuel Makron mamlakatda o‘rta maktablarda amalda bo‘lgan mobil telefonlardan foydalanish taqiqi kelgusi o‘quv yilidan yuqori sinf o‘quvchilariga ham tatbiq etilishini e’lon qildi. Bu haqda Zamin.uz xabar berdi.

Ushbu chora 2025-yildan boshlab bosqichma-bosqich amalga oshiriladi. Bu yangi siyosat hozirgacha yuzga yaqin maktabda sinovdan o‘tkazilib, muvaffaqiyatli natijalar bergan.

Prezident Makronning ta’kidlashicha, bu qadam yoshlar o‘rtasidagi yolg‘izlik va ruhiy salomatlik muammolarini kamaytirishga qaratilgan. Ijtimoiy tarmoqlarda haddan tashqari ko‘p vaqt o‘tkazish o‘quvchilarning psixologik holatiga salbiy ta’sir ko‘rsatishi mumkin.

Shuning uchun maktablarda telefonlardan foydalanishni cheklash orqali o‘quvchilarning ruhiy va jismoniy sog‘lig‘ini yaxshilashga erishish maqsad qilingan. “Raqamli tanaffus” deb nomlangan bu tashabbus yoshlarni ijtimoiy tarmoqlardan uzoqlashtirib, ularning o‘zaro muloqot va darslarga bo‘lgan e’tiborini oshirishga xizmat qiladi.

Shu orqali o‘quv jarayonining samaradorligi ham ortishi kutilmoqda.