Revolut ayrim davlatlardan Fransiyaga pul o‘tkazishni chekladi
Britaniyada joylashgan Revolut banki O‘zbekiston, Qozog‘iston va bir qator boshqa davlatlardan Fransiyaga pul o‘tkazmalarini chekladi. Bu haqda Zamin.uz xabar berdi.
Ushbu ma’lumotni Oninvest portali moliyaviy tashkilotning maktubiga asoslanib e’lon qildi. Revolut banki mijozlarga xizmat ko‘rsatish bo‘limining ta’kidlashicha, bu qaror bank tomonidan mustaqil ravishda qabul qilinmagan.
Cheklov to‘lovlarni qayta ishlash bo‘yicha hamkorlarning talablariga muvofiq joriy etilgan. Cheklov kiritilgan davlatlar orasida Afg‘oniston, Armaniston, Ozarbayjon, Xitoy, Rossiya, shuningdek, Afrika va Yevropaning ayrim mamlakatlari bor.
Bundan oldin Rossiya fuqarolarining Yevropa Ittifoqida Revolut hisoblariga MDH davlatlarida ochilgan kartalar orqali mablag‘ o‘tkazishda muammolarga duch kelgani haqida xabar berilgan edi. Oninvestning qayd etishicha, ushbu operatsiyalar amalga oshirilmoqchi bo‘lgan hech bir bank sanksiyalar ostida emas.
Revolut 2015 yilda Londonda tashkil etilgan britan neobankidir. Ushbu bank mijozlariga hisoblarni onlayn ochish va moliyaviy operatsiyalarni mobil ilova orqali boshqarish imkoniyatini taklif etadi.
Foydalanuvchilar mablag‘ni turli valyutalarda saqlash, ularni banklararo kurs bo‘yicha almashtirish va xorijga tez va kam komissiya bilan o‘tkazish imkoniyatiga ega.
