Hindiston barcha smartfonlarga kuzatuv ilovasi o‘rnatadi
Hindiston hukumati Sanchar Saathi nomli yangi monitoring ilovasini mamlakatdagi barcha smartfonlarga o‘rnatishni talab qilmoqda. Bu haqda Zamin.uz xabar berdi.
Ushbu qaror 1-dekabr kuni Hindiston Matbuot axboroti byurosi tomonidan e’lon qilindi. Hukumating fikriga ko‘ra, mazkur ilova kiberjinoyatchilik va firibgarlikka qarshi kurashish hamda fuqarolarni davlat faoliyati haqida xabardor qilish maqsadida joriy etilmoqda.
Sanchar Saathi ilovasi yordamida o‘g‘irlangan yoki yo‘qolgan telefonlarni aniqlash va bloklash mumkin. Shuningdek, ilova orqali hozirgacha 700 mingdan ortiq yo‘qolgan telefonlardagi ma’lumotlar tiklangan.
Hukumat qaroriga asosan, Apple, Samsung, Xiaomi kabi yirik smartfon ishlab chiqaruvchilar 90 kun ichida ushbu ilovani yangi va foydalanilayotgan barcha qurilmalarga o‘rnatishi kerak bo‘ladi. Biroq, bu talab turli munozaralarga sabab bo‘lmoqda.
Muxolifat va huquq himoyachilari bu tashabbusni keskin tanqid qilib, uni konstitutsiyaga zid deb baholashmoqda. Ularning fikricha, hukumat ushbu ilova orqali fuqarolar ustidan nazoratni kuchaytirishni rejalashtirgan bo‘lishi mumkin.
Shuningdek, Apple kompaniyasi bu talabni bajarishni rejalashtirmayotganini ma’lum qildi. Reuters agentligining xabariga ko‘ra, kompaniya Nyu-Dehli hukumatiga o‘z xavotirlarini yetkazishni mo‘ljallamoqda.
Ushbu tashabbus Hindistondagi texnologik rivojlanish va davlat siyosatining yangi bosqichini boshlab berishi kutilmoqda. Ammo bu qaror shaxsiy hayot daxlsizligiga oid muammolarni ham keltirib chiqarishi ehtimoldan xoli emas.
