Pentagon vaziri maxfiy ma’lumotni oshkor qilgani tanqidga uchradi
2025-yil mart oyida AQSh mudofaa vaziri Pit Hegset maxfiy ma’lumotni noto‘g‘ri tarzda oshkor qilgani sababli tanqid ostida qoldi. Bu haqda Zamin.uz xabar berdi.
U Yamanlik husiychilar pozitsiyalariga rejalashtirilgan havodan zarbalar haqida Signal messenjerida jurnalist ishtirok etgan guruhga ma’lumot yuborgan. Bu holat Amerika qo‘shinlari xavfsizligini xavf ostiga qo‘yishi mumkin edi.
CNN va AP agentliklari xabariga ko‘ra, bu holat Pentagon bosh inspektori tomonidan o‘rganilgan. Surishtiruv natijasida aniqlanishicha, Hegset maxfiylik darajasini pasaytirishga ruxsati bo‘lsa-da, Pentagonning ichki qoidalarini buzgani qayd etilgan.
U xizmat vazifalarida shaxsiy qurilmasidan foydalangan. Shu sababli inspektor xodimlarning qo‘shimcha o‘qitilishini tavsiya qildi.
Hegset inspektor bilan shaxsan suhbatlashishdan bosh tortgan, biroq yozma ravishda o‘z harakatlarini oqlashga uringan. U chatda faqat xavfsizlikka tahdid solmaydigan ma’lumotlarni berganini ta’kidlagan.
Jumladan, harbiy samolyotlarning uchish vaqti haqida yozgan. Pentagon Hegsetni qo‘llab-quvvatlab chiqdi.
Harbiy idora vakili Shon Parnell bosh inspektor tekshiruvi vazirni oqlaganini va maxfiy ma’lumot tarqatilmaganini ta’kidladi. Shuningdek, AQSh prezidenti Donald Tramp ham Hegsetni qo‘llab-quvvatlashini ma’lum qildi.
Biroq The Atlantic nashri bosh muharriri Jeffri Goldberg o‘zining ushbu chatga tasodifan qo‘shib yuborilganini aytib o‘tdi. Chatda yuqori martabali amaldorlar, jumladan, Milliy xavfsizlik maslahatchilari va razvedka rahbarlari ham bo‘lgan.
Nashr ushbu yozishmalar stenogrammasini e’lon qilib, voqeaga e’tibor qaratdi. Bu holat Pentagon ichki qoidalariga amal qilish masalasini yana bir bor kun tartibiga olib chiqdi.
